થેન્ક પ્રભુ.. સિનેમાપ્રેમી-થિયેટરનો સેતુ સ્થપાઈ રહ્યો છે

રામ સેતુ-થેન્ક ગૉડઃ પ્રેક્ષકોની પસંદ કઈ? ભૂસ્તરશાસ્ત્રનાં રહસ્ય કે મૉડર્ન ચિત્રગુપ્ત?

આને પિંચોતેરનો પરતાપ કહીશું કે બીજું કાંઈ? ના ના, વાત આઝાદીના અમૃત મહોત્સવની નથી. વસ્તુ એવી છે કે પંચોતેર રૂપિયા ટિકિટ રાખવામાં આવે તો લોકો થિયેટરો છલકાવી દે છે. ફિલ્મપંડિતો પણ આ જોઈને હરખાઈ રહ્યા છે કે વાહ, લોકો થિયેટરમાં ગિરદી કરી રહ્યા છે. લાગે છે, ફિલ્લમવાળાની દિવાળી સારી જશે.

ઓણ સાલ દિવાળીમાં (પચ્ચીસ ઑક્ટોબરે) અક્ષય કુમાર અને અજય દેવગન ટિકિટબારી પર સૌથી વધારે વકરો લેવા ધક્કામુક્કી કરશે. અજય દેવગન-સિદ્ધાર્થ મલ્હોત્રા અભિનિત થેન્ક ગૉડ અને અક્ષય કુમારની રામ સેતુ એકસાથે આવી રહી છે. આમ જોવા જઈએ તો આ બન્ને કલાકારોને એક સુપર હિટની તાતી જરૂર છે. છેલ્લા થોડા સમય દરમિયાન અક્ષયની ફિલ્મો ક્યારે આવી ને ગઈ એ જ ખબર ન પડી, જ્યારે અજયની રનવે ૩૪ ઠીક મારા ભાઈ જેવી રહી. રામ સેતુમાં અક્ષય સાથે નુસરત ભરૂચા–જેક્વેલિન ફર્નાન્ડીસ છે તો અજય સાથે છે સિદ્ધાર્થ મલ્હોત્રા, જેની પાછલી ફિલ્મ શેરશાહ જબ્બર હિટ થયેલી.

ઈન્ટરેસ્ટિંગ હકીકત એ છે કે અજય-અક્ષયની ફિલ્મોની ટક્કર આ પહેલાં પણ થતી રહી છે, જેમ કે પ્યાર તો હોના હી થા અને અંગારે, દીવાને અને ધડકન અને બ્લુ, ગોલમાલ થ્રી અને ઍક્શન રિપ્લે, ટુનપુર કા સુપર હીરો અને તીસ માર ખાં..