પ્રેરણાનો, સેવા-સમર્પણનો મહોત્સવ..

છેલ્લાં થોડાં વર્ષથી દેશ-વિદેશમાં ઊજવાઈ રહેલા પરમ પૂજ્ય પ્રમુખસ્વામી મહારાજ (૧૯૨૧-૨૦૧૬) શતાબ્દી ઉત્સવનો ચરમ અમદાવાદમાં આવી રહ્યો છે ત્યારે લઈએ એક ઝલક મહોત્સવની તથા ખાસ આ મહાઉત્સવ માટે નિર્માયેલા વિશાળ નગરની.

- કેતન મિસ્ત્રી (અમદાવાદ)

ભારતના મહાન સંતોની યાદ અપાવતું પ્રમુખસ્વામી નગરનું મુખ્ય પ્રવેશદ્વાર.

ઉત્તર પ્રદેશમાં અયોધ્યા નજીક આવેલા છપૈયા ગામમાં જન્મીને ગુજરાતને કર્મભૂમિ બનાવનારા ભગવાન સ્વામિનારાયણની ગુરુપરંપરાના પાંચમા ગુરુદેવ તથા સંતવિભૂતિ પ્રમુખસ્વામી મહારાજે ૧૮ વર્ષની વયે દીક્ષા લીધી અને સેવા-સાધુતા-લોકકલ્યાણની ભાવનાથી કરેલાં વિરાટ કાર્યો માટે દેશ-દુનિયામાં સુખ્યાત થયા. ૭ ડિસેમ્બર, ૧૯૨૧ના રોજ વડોદરા નજીક ચાણસદ ગામે જન્મેલા પ્રમુખસ્વામીનું ૧૩ ઓગસ્ટ, ૨૦૧૬ના રોજ ૯૫ વર્ષની વયે બોટાદ જિલ્લામાં બીએપીએસ સારંગપુર મંદિરમાં ધામગમન થયું. ત્યાર બાદ એમના જન્મદિવસ શતાબ્દી મહોત્સવ તરીકે ઊજવાયા.

હવે આ શતાબ્દી મહોત્સવનો ચરમ આવી રહ્યો છે ૧૫ ડિસેમ્બર, ૨૦૨૨ના રોજ. આ દિવસે બોચાસણવાસી શ્રી અક્ષર પુરુષોત્તમ સ્વામિનારાયણ સંસ્થા (બીએપીએસ)ના પાંચ ત્મિક ઉત્તરાધિકારી પ્રમુખસ્વામીના શતાબ્દી મહોત્સવનો પ્રારંભ થશે.

તાજેતરમાં ચિત્રલેખાના પ્રતિનિધિએ અમદાવાદના પશ્ચિમ છેડે ઓગણજ સર્કલ નજીક, સરદાર પટેલ રિંગ રોડના કિનારે આવેલા મહોત્સવસ્થળની મુલાકાત લીધી ત્યારે ૬૦૦ એકર ભૂમિ પર પ્રમુખસ્વામી મહારાજ નગરના સર્જનને આખરી ઓપ આપવામાં આવી રહ્યો હતો. નગરનાં સાત પ્રવેશદ્વારમાં મુખ્ય છેઃ એસપી રિંગ રોડ પરથી આકર્ષતું, ૨૮૦ ફૂટ પહોળું અને ૫૧ ફૂટ ઊંચું નયનરમ્ય સંત દ્વાર. અહીંથી નગરપ્રવેશ કરતાં જ ૩૦ ફુટ પ્રમુખસ્વામીની દિવ્ય સ્વર્ણિમ પ્રતિમાનાં દર્શન થશે. આ પ્રતિમાની ખાસિયત એ છે કે પ્રતિમાની ફરતે પૂજ્ય પ્રમુખસ્વામીનાં જીવન અને કાર્યોને આવરી લેતી એક ઝાંખી થશે. સ્વામીશ્રીનું એક કાર્ય એટલે દેશ-દુનિયામાં ૧૧૦૦ જેટલાં મંદિરોનાં સર્જન કરી ભારતીય સંસ્કૃતિનો સંદેશ ખૂણે ખૂણે પહોંચાડ્યો. એ તમામ મંદિરોના પ્રતીક સમી નગરમાં સર્જાયેલી દિલ્હી અક્ષરધામની ૬૭ ઊંચી હૂબહૂ પ્રતિકૃતિ ધ્યાનાકર્ષિત છે.