પુનરાવર્તન ટાળવા ભાજપનું કૉક્ટેલ તો કોંગ્રેસનો જૂના જોગીઓ પર ભરોસો

ચૂંટણીની ચોપાટમાં સૌરાષ્ટ્રનાં બદલાયેલાં રાજકીય સમીકરણ શું પરિણામ લાવશે?

- દેવેન્દ્ર જાની (રાજકોટ)

‘આપ’ના ઈસુદાન ગઢવીએ દ્વારકાને બદલે ખંભાળિયાથી ચૂંટણીનું ગાડું દોડાવવાનું નક્કી કર્યું.

વર્ષ ૨૦૧૭ની ગુજરાત વિધાનસભા ચૂંટણીમાં ભાજપનો વિજયરથ ત્રણ આંકડા સુધી ન પહોંચી શક્યો એનું સૌથી મોટું કારણ હતું: સૌરાષ્ટ્ર. વર્ષો પછી એવું થયેલું કે સૌરાષ્ટ્રમાં ભાજપને કોંગ્રેસ કરતાં ઓછી બેઠક મળી હતી. પાટીદાર આંદોલનને કારણે ભાજપને આ વિસ્તારમાં મોટું રાજકીય નુકસાન થયું હતું. પરિણામે આખા ગુજરાતમાં ભાજપને ૯૯ બેઠકથી સંતોષ માનવો પડ્યો હતો. સૌરાષ્ટ્રમાં અમરેલી, ગીર સોમનાથ અને મોરબી એ ત્રણ જિલ્લામાં તો ભાજપનું ખાતું સુદ્ધાં ખૂલ્યું નહોતું.

આ વખતે ૨૦૧૭નું પુનરાવર્તન ન થાય એ માટે એક-એક બેઠકના રાજકીય ગણિતને બરાબર સમજીને ભાજપે મુરતિયા મેદાને ઉતાર્યા છે.

સિદ્ધાંતો સાથે સમાધાન કરીને પણ કેટલીક બેઠક પર ભાજપે માત્ર જીતના મંત્રને નજર સમક્ષ રાખીને ટિકિટ આપી હોવાનું ચિત્ર ઊપસ્યું છે. ભાજપે જીત માટે પોલિટિકલ કૉક્ટેલ બનાવ્યું છે. કોંગ્રેસમાંથી ભગાભાઈ બારડ જેવા દિગ્ગજ નેતાઓને કેસરિયો ખેસ પહેરાવી કલાકોમાં ટિકિટ આપી ગીર સોમનાથ જેવા નબળા જિલ્લામાં રાતોરાત રાજકીય સ્થિતિ મજબૂત બનાવવાનો પ્રયાસ ભાજપે કર્યો છે તો કોંગ્રેસે મોટા ભાગના જૂના ચહેરા પર ભરોસો મૂકી રિપીટ કર્યા છે એટલે અમુક સીટને બાદ કરતાં નવાને ખાસ તક મળી નથી.

ભાજપમાં અગાઉ એવી ચર્ચા હતી કે ઉમેદવારોની પસંદગીમાં કોઈ ચોક્કસ થિયરી અપનાવવામાં આવશે. ભાજપમાં જાતિવાદ અને પરિવારવાદ નહીં ચલાવાય, શિક્ષિત આગેવાનને ટિકિટ આપવામાં આવશે, અગાઉ હારેલા ઉમેદવારને તથા ત્રણ કે ચાર ટર્મથી ધારાસભ્ય હોય એમને હવે તક નહીં મળે, કોંગ્રેસમાંથી હવે કોઈ નેતાને લેવામાં નહીં આવે જેવી અનેક વાત પક્ષના નેતાઓ કહેતા હતા, પરંતુ ઉમેદવારી ઠેરવવા પક્ષે મનોમંથન કર્યું ત્યારે કોઈ પણ ભોગે બેઠક જીતવી એ એકમાત્ર માપદંડ રખાયો હોવાનું તારણ સામે આવ્યું છે.