૨૧ માર્ચઃ વિશ્વ સુગંધ દિવસ ગુલાબો.. જરા ગંધ ફૈલા દો, ગુલાબો.. જરા ઈત્ર ગિરા દો!

સુગંધની લહેર સાથે યાદોની તરંગની અનુભૂતિ કરાવતો વિશ્વ સુવાસ દિવસ ઊજવાઈ રહ્યો છે ત્યારે જાણીએ, ભારતના પરફ્યુમ માર્કેટની ટ્રેન્ડિંગ સુવાસની લહેરોને.

- સ્મિતા આયંગર

સુવાસનો મહિમા ભારતીય સંસ્કૃતિમાં હજારો વર્ષોથી ગવાતો આવ્યો છે. કહેવાય છે કે અત્તર બનાવવાની કળાનો જન્મ આશરે ૫૦૦૦ વર્ષ પહેલાં ભારતમાં જ થયો હતો. ત્યારથી અત્યાર સુધી માનવજીવનમાં સુગંધનું મહત્ત્વ વધતું રહ્યું છે. આજના સોશિયલ મિડિયાના યુગમાં તથા ભારતીય પ્રવાસી દુનિયાઆખી ધમરોળી રહ્યો છે ત્યારે ભારતીય યુવાપેઢીમાં સુગંધ માટેનો રસ વધી રહ્યો છે. વિશ્વભરમાં ૨૧ માર્ચ ઈન્ટરનૅશનલ ફ્રેગ્રન્સ ડે એટલે કે વિશ્વ સુવાસ દિવસ તરીકે ઊજવવામાં આવે છે ત્યારે ભારતના સુગંધવિશ્વમાં ચાલી રહેલા લેટેસ્ટ ટ્રેન્ડ પર નજર નાખીએ.

ગુલાબસિંહ જોહરીમલ

૧૮૧૬માં સ્થપાયેલી દિલ્હીની ગુલાબસિંહ જોહરીમલ એટલે ભારતની સૌથી જૂની હેરિટેજ પરફ્યુમરીઝમાંની એક. સુગંધપ્રેમીઓ માટે આ સ્વર્ગનું સરનામું ગણાય. ગુલાબસિંહ જોહરીમલની સાતમી પેઢીના માસ્ટર પરફ્યુમર મુકુલ ગન્ધી કહે છે: ‘આજની પેઢીમાં સુગંધ વિશે જ્ઞાન તેમ જ એના વિશે જાણવાનું કુતૂહલ વધી રહ્યું છે. આને કારણે ભારતના યુવાનો એમના મૂળ તરફ પાછા ફરી રહ્યા છે. નવી પેઢીના યુવાનો ગુલાબ, મોગરા, ખસ, રજનીગંધા, પારિજાત અને ખાસ તો ઉદ અથવા અગર જેવી આપણી વર્ષો પુરાણી પરંપરાગત સુગંધ અજમાવી રહ્યા છે.’

નવી પેઢીના યુવાનો ખાસ તો ‘ઉદ’ અથવા ‘અગર’ જેવી આપણી વર્ષો પુરાણી પરંપરાગત સુગંધ અજમાવી રહ્યા છે.

મુકુલ ગન્ધી ઉમેરે છેઃ ‘ઉદ અથવા અગરનો ઉલ્લેખ આયુર્વેદ અને બીજા પ્રાચીન ભારતીય ગ્રંથોમાં પણ છે. ગન્ધીનું રૉયલ ઉદ સીડર એ લેટેસ્ટ પરફ્યુમ છે, જેમાં ભારતીય ઉદની સાથે વૂડી અને લીંબુ જેવી સાઈટ્રસ નોટ્સની સુગંધ છે. આ લાઈટ અને યુનિસેક્સ પરફ્યુમ યુવા ભારતીયોમાં લોકપ્રિય બન્યું છે.’