பா.ஜ.க.வுடன் தொடர்பில் இருந்தாலும் விஜய், சீமானுக்காக கூட்டணிக் கதவை திறந்து வைத்திருக்கும் அ.தி.மு.க.!

அரசியல் களத்தில் உலாவரும் பரபரப்பு தகவல்கள்!!

- 

2026 சட்டமன்ற தேர்தலை முன்னிட்டு தமிழக அரசியல்கட்சிகள் இப்போதே கூட்டணி தொடர்பாக பேச்சுவார்த்தையை தொடங்கியுள்ளன. எதிர்க்கட்சி யான அ.தி.மு.க., பா.ஜ.க. உடன் கூட்டணி அமைக்க உள்ளதாக தகவல்கள் வெளியாகி வரும் அதே வேளையில், நடிகர் விஜய்யின் த.வெ.க. மற்றும் சீமானின் நாம் தமிழர் கட்சிகளுக்காகவும் கூட்டணிக் கதவுகளை திறந்தே வைத்திருப்பதாகக் கூறப்படுகிறது. கூட்டணி பேச்சுவார்த்தை இறுதிக்கட்டத்தை எட்டும் போது தான் எந்த கட்சிகள் கூட்டணியில் இணையும் என்பது தெரிய வரும்.

தமிழ்நாட்டில் அடுத்த ஆண்டு சட்டமன்ற தேர்தல் நடைபெற உள்ள நிலையில், அனைத்து அரசியல் கட்சிகளும் இப்போதே தேர்தலுக்கு ஆயத்தமாகி வருகின்றன. ஆளும் தி.மு.க. கடந்த தேர்தல்களில் அடைந்துள்ள தொடர் வெற்றிகளைத் தொடர்ந்து தனது வலுவான கூட்டணியுடன் சட்டமன்ற தேர்தலை சந்திக்க தயாராக உள்ளது.

அதே சமயம், ஜெயலலிதா மறைவைத் தொடர்ந்து அ.தி.மு.க.-வில் பிளவு ஏற்பட்ட பிறகு, அதன் வாக்கு சதவீதம் வெகுவாக குறைந்து கொண்டே இருக்கிறது. கடந்த 2019 மக்களவை தேர்தல், 2021 சட்டமன்ற தேர்தலில் பா.ஜ.க.வுடன் கூட்டணி அமைத்து தோல்வி கண்ட அ.தி.மு.க. கடந்தாண்டு நடந்த மக்களவை தேர்தலில் பா.ஜ.க. கூட்டணியில் இருந்து வெளியேறிய போதும் தோல்வியையே சந்தித்தது.

இதனால் வரும் சட்டமன்ற தேர்தலில் வலுவான கூட்டணி அமைத்தால் மட்டுமே தி.மு.க.-வை எதிர்கொள்ள முடியும் என்ற கட்டாயத்தில் அ.தி.மு.க. உள்ளது. அதன் தொடர்ச்சியாக அ.தி.மு.க. பொதுச்செயலாளர் எடப்பாடி பழனிசாமி தலைமையிலான குழு டெல்லி சென்று உள்துறை அமைச்சர் அமித் ஷாவை சந்தித்து கூட்டணி தொடர்பாக பேச்சுவார்த்தை நடத்தினார். அ.தி.மு.க. உடன் கூட்டணி அமைப்பதை உறுதி செய்த அமித் ஷா, உரிய நேரத்தில் அறிவிப்பு வெளியாகும் என்று கூறினார்.