പ്രണയവഴിയിൽ ഇടറും മുമ്പേ

അതുവരെ ഒരു ‘നോ’ കേൾക്കുമ്പോഴേക്കും ജീവന്റെ ജീവനായി കണ്ടിരുന്നയാളെ ഇല്ലാതാക്കുന്നത് പ്രണയമാണോ? ബന്ധങ്ങളെ എങ്ങനെ സമീപിക്കണമെന്ന് നമ്മൾ മക്കളെ പഠിപ്പിച്ചിട്ടുണ്ടോ? ഇല്ലെങ്കിൽ അതിനുള്ള സമയം അതിക്രമിച്ചിട്ടുണ്ട്...

- റസീന എം.എ ലൈഫ് കോച്ച് eBeams Infotech

ഞാനവളെ അത്രയേറെ സ്നേഹിച്ചിരുന്നു. എന്നെ ഉപേക്ഷിച്ച് അവൾ മറ്റൊരാളോടൊപ്പം ജീവിക്കുന്നത് ആലോചിക്കാൻപോലും കഴിയില്ല. ഒടുവിൽ, എന്നെ വേണ്ടെന്നുവെച്ചു. അവൾ ജീവിക്കേണ്ടെന്ന് ഞാനും തീരുമാനിച്ചു... പ്രണയത്തിൽ നിന്ന് പിന്മാറിയ പെൺകുട്ടിയെ കൊലപ്പെടുത്തിയ യുവാവിന്റെ വാക്കുകളാണിത്.

ഞെട്ടലോടെയാണ് നമ്മൾ ഈ വാർത്ത കണ്ടത്. മനുഷ്യജീവിതത്തിലെ തന്നെ ഏറ്റവും മനോഹര അനുഭവമായ പ്രണയം ജീവനെടുക്കുകയും ജീവനൊടുക്കുകയും ചെയ്യുന്ന ക്രൂരതയായി പരിണമിക്കുന്ന ഞെട്ടിക്കുന്ന കാഴ്ച. ഇതൊരു ഒറ്റപ്പെട്ട സംഭവമായി ചുരുങ്ങുന്നില്ല. അടുത്തകാലത്തായി പ്രണയത്തെ തുടർന്നുള്ള അക്രമങ്ങളും കൊലപാതകങ്ങളും ഒരു തുടർകഥയായി മാറുന്നു.

പഠനവും ജോലിയും മറ്റു സ്വപ്നങ്ങളുമായി പോകുന്ന സ്വന്തം മക്കളെ കുറിച്ച് മാതാപിതാക്കൾ ഉച്ചത്തിൽ ആശങ്കപ്പെടാൻ തുടങ്ങിയിട്ടുണ്ട്. ഇവിടെ നമുക്കെന്താണ് ചെയ്യാൻ കഴിയുക എന്നതാണ് പ്രധാനപ്പെട്ട ചോദ്യം.

കൂടിവരുന്നു, മെന്റൽ ട്രോമ

 വിവര സാങ്കേതികവിദ്യകളും വിദ്യാഭ്യാസവും അവസരങ്ങളും ആഗോള സംസ്കാരങ്ങളിലേക്കുള്ള ജാലകങ്ങളും തുറന്നിട്ടതോടെ പുതിയ തലമുറയുടെ കാഴ്ചപ്പാടുകളിൽ ഒരുപാട് പുരോഗമനപരമായ മാറ്റങ്ങൾ സംഭവിച്ചിട്ടുണ്ട്. പക്ഷേ, അപക്വവും അപകടകരവുമായ ബന്ധങ്ങളും അതിനെ തുടർന്ന് ഇമോഷനൽ, മെൻറൽ ട്രോമകളും ചെറുപ്പക്കാരെ കൂടുതലായി ബാധിക്കുന്നു. ഉന്നത വിദ്യാഭ്യാസവും സുരക്ഷിതമായ കുടുംബപശ്ചാത്തലവുമുള്ള യുവാക്കളാണ് പലപ്പോഴും ക്രിമിനൽ സ്വഭാവം പോലും പ്രകടിപ്പിക്കുന്ന തരത്തിലേക്ക് പ്രണയബന്ധങ്ങളിലെ വൈകാരിക വിക്ഷോഭങ്ങൾ മൂലം എത്തിപ്പെടുന്നത്.

പരിശീലനം വേണം മനസ്സ് നിയന്ത്രിക്കാൻ

ചെറുപ്പം മുതൽ തന്നെ ഓരോ വ്യക്തിക്കും ലഭിക്കേണ്ട മനഃശാസ്ത്രപരവും സാമൂഹികവുമായ ചില പരിശീലനങ്ങളുടെ അഭാവം ഇത്തരം പ്രശ്നങ്ങളുടെ കാതലാണ്. ആശങ്കയോ ഒളിച്ചു വെക്കലുകളോ വിലക്കുകളോ അല്ല, തുറന്ന സംസാരങ്ങളും ആരോഗ്യകരമായ ചർച്ചകളും ബൗണ്ടറികളുമാണ് വേണ്ടത്.