രാജുവിന്റെ കുതിരജീവിതം

ജീവിതചിത്രം പൂർത്തീകരിക്കാൻ സൗദിയിലെത്തിയ രാജു ഫ്രാൻസിസ് എന്ന ചിത്രകാരനെ കാത്തിരുന്നത് ദുരിതപൂർണമായ കുതിര ജീവിതമായിരുന്നു. മൂന്നു പതിറ്റാണ്ടിന്റെ കഷ്ടപാടിനൊടുവിൽ കുതിരകളുടെ മെയിൻ അസിസ്റ്റന്റ് ട്രെയിനറായി വളർന്ന രാജുവിന് കണ്ണീരുപ്പ് കലർന്ന അനേകം കഥകൾ പറയാനുണ്ട്

- നജിം കൊച്ചുകലുങ്ക്

പ്രശസ്ത ക്ലാർനെറ്റ് വാദകന്റെ മകൻ, ചിത്രകലയിൽ നല്ല വരപാടവം, നാട്ടിൽ ആർട്ട് സ്റ്റുഡിയോ നടത്തിയ പരിചയം. എന്നിട്ടും സൗദി അറേബ്യയിൽ രാജു ഫ്രാൻസിസിനെ കാത്തിരുന്നത് കുതിര ജീവിതമായിരുന്നു. രണ്ടുവർഷം അനുഭവിച്ച ദുരിതത്തിനും കുടിച്ച കണ്ണീരിനും കണക്കില്ല.

നാട്ടിൽ നിറയെ കടമാണ്. കൂടെപ്പിറപ്പുകളെ വിവാഹം കഴിപ്പിച്ചപ്പോൾ ഉള്ള കിടപ്പാടം വിറ്റുപോയി. രോഗാതുരനായ അച്ഛനും അമ്മയുമടങ്ങുന്ന കുടുംബം വാടക വീട്ടിലാണ്. നിത്യജീവിതം കഴിഞ്ഞുപോകണം. നാട്ടിൽ ബോർഡ് എഴുതിയും ചിത്രം വരച്ചും കുറെ നോക്കി, ദൈനംദിന ജീവിത ചിത്രം ഒന്ന് പൂർത്തിയാക്കാൻ. പക്ഷേ, നടന്നില്ല. അതുകൊണ്ടാണ് പലരിൽനിന്ന് കടമായി അരലക്ഷം രൂപ സ്വരൂപിച്ച് ഏജന്റിന് കൊടുത്ത് സൗദിയിലേക്ക് വിസ ഒപ്പിച്ചത്. ബ്രഷും മോഹങ്ങളുമെല്ലാം വീട്ടിൽ വെച്ചിട്ടാണ് വിമാനം കയറിയത്. തൊഴിലാളികളെ വാടകക്ക് കൊടുക്കുന്ന സൗദി കരാറുകാരന്റെ വിസയിലാണ് വന്നത്. 1994ലായിരുന്നു അത്. കൂടെ കുറെയാളുകളുമുണ്ടായിരുന്നു. റിയാദ് നസീമിലെ പൊലീസ് ട്രെയിനിങ് കോളജിലെ കുതിരപ്പടയുടെ ലയത്തിലായിരുന്നു ജോലി. 450 റിയാലായിരുന്നു ശമ്പളം. 50 റിയാൽ ഇഖാമ (റെസിഡന്റ് പെർമിറ്റ്) ഫീസ് കഫീൽ കുറക്കും. ആഹാരത്തിനും മറ്റുമുള്ള ചെലവ് കഴിച്ചാൽ തുച്ഛമായ പണം ബാക്കിയുണ്ടാവും. അതാണ് നാട്ടിലേക്ക് അയക്കുക. അതുപോലും വലിയ ആശ്വാസമായിരുന്നു നാട്ടിൽ കുടുംബത്തിന്.

അതിനിടയിലാണ് അലർജിയും അസുഖങ്ങളും വന്നത്. ഒട്ടും ജോലിയിൽ തുടരാനാവാത്ത സ്ഥിതി. മനസ്സലിഞ്ഞ കോളജ് അധികൃതർ കരാറുകാരനെ വിളിപ്പിച്ച് രാജുവിനെ കൊണ്ടുപോയി ചികിത്സ നൽകി ഭേദമാക്കിയശേഷം വേറെ ജോലിയിലാക്കാൻ നിർദേശിച്ചു. ശരീരമാകെ പഴുത്തുപൊന്തിയും നീരൊലിച്ചും വികൃതമായ സ്ഥിതിയിലായിരുന്നു. കഫീലിന്റെ ഗോഡൗണിലേക്കാണ് കൊണ്ടുപോയത്. ആ സമയത്ത് വിദേശത്ത് യാത്രയിലായിരുന്ന കഫീൽ തിരിച്ചെത്തി. ആശുപത്രിയിൽ കൊണ്ടുപോയി. കുറച്ചുകാലത്തെ ചികിത്സ കൊണ്ട് അസുഖം ഭേദമായി.

പുതിയ ലയത്തിൽ

പുതിയൊരു കുതിരലയത്തിലേക്കാണ് കഫീൽ പിന്നീട് കൊണ്ടുപോയത്. സൗദി മുൻ ഭരണാധികാരി ഖാലിദ് രാജാവിന്റെ മകനും അബഹ മുൻ ഗവർണറും നിലവിൽ രാജാവിന്റെ ഉപദേഷ്ടാക്കളിൽ ഒരാളുമായ ഫൈസൽ ബിൻ ഖാലിദ് രാജകുമാരന്റെ ഉടമസ്ഥതയിലുള്ള റേസിങ് സ്റ്റെബിളിൽ. റേസിങ് കുതിരകളെ പരിപാലിക്കുന്ന സ്ഥലമാണ് സ്റ്റെബിൾ (കുതിരപ്പന്തി). അന്ന് റിയാദിലെ പ്രധാന റേസ്കോഴ് സ് നഗരഹൃദയമായ മലസിലായിരുന്നു.