ഉറക്കത്തിനു നേരെ കണ്ണടക്കരുത്

നിശ്ചിത സമയം തടസ്സമില്ലാതെ ദിവസേന ഉറങ്ങുകയെന്നത് ശരീരത്തിന്റെയും മനസ്സിന്റെയും ആരോഗ്യത്തിന് അതാവശ്യമാണ്. ഉറക്കക്കുറവ് സൃഷ്ടിക്കുന്ന ആരോഗ്യ പ്രശ്നങ്ങളും നന്നായി ഉറങ്ങാനുള്ള മാർഗങ്ങളുമറിയാം...

- ഡോ. ഷാഹുൽ അമീൻ Psychiatrist, St. Thomas Hospital. Changanassery Editor, Indian Journal of Psychological Medicine. www.mind.in

A good laugh and a long sleep are the best cures in the doctor's book' എന്നത് പ്രശസ്തമായ ഒരു ഐറിഷ് പഴമൊഴിയാണെങ്കിലും അതിലൊരു വൈദ്യശാസ്ത്ര സത്യം ഒളിഞ്ഞിരിപ്പുണ്ട്. കാലാകാലങ്ങളായി നടന്നിട്ടുള്ള ഗവേഷണങ്ങളിൽ ഉറക്കം ജീവന്റെ നില നിൽപിനുതന്നെ അനിവാര്യമാണെന്ന് കണ്ടെത്തിയിട്ടുണ്ട്. പ്രായത്തിനനുസരിച്ച് നിശ്ചിത സമയം തടസ്സമില്ലാതെ ദിവസേന ഉറങ്ങുകയെന്നത് ശരീരത്തിന്റെയും മനസ്സിന്റെയും ആരോഗ്യത്തിന് അത്യാവശ്യമാണ്.

ദീർഘകാലത്തെ ഉറക്കപ്രശ്നങ്ങൾ വ്യക്തികളെ പലതരത്തിലുള്ള രോഗാവസ്ഥകളിലേക്ക് നയിക്കുമെന്ന് പഠനങ്ങൾ മുന്നറിയിപ്പ് നൽകുന്നുണ്ട്. ഉറക്കവുമായി ബന്ധപ്പെട്ട് എലികളിൽ നടത്തിയ ഗവേഷണങ്ങൾ ഇതിന് തെളിവാണ്. സാധാരണയായി മൂന്നുവർഷംവരെ ആയുസ്സുള്ള എലികളെ പരീക്ഷണശാലകളിൽ കൊണ്ടുവന്ന് അവയുടെ ഉറക്കം നിരന്തരം തടസ്സപ്പെടുത്തിയപ്പോൾ കണ്ടത് ഞെട്ടിക്കുന്ന ഫലങ്ങളാണ്. ശരിയായി ഉറങ്ങാൻ കഴിയാതെ രണ്ടോ മൂന്നോ ആഴ്ചകൾ പിന്നിട്ടപ്പോൾ അവയിൽ പലതിന്റെയും ആയുസ്സൊടുങ്ങുകയായിരുന്നു.

ഉറക്കക്കുറവ് സൃഷ്ടിക്കുന്ന ശാരീരിക പ്രശ്നങ്ങൾ

ഉറക്കം ഒരർഥത്തിൽ ശരീരത്തിന്റെയും മനസ്സിന്റെയും വിശ്രമാവസ്ഥയാണ്. അതേ സമയം, ഉറക്കത്തിൽ ഒരു അവയവവും പ്രവർത്തനരഹിതമാകുന്നില്ലെന്നു മാത്രമല്ല, ചില ഹോർമോണുകളുടെ ഉൽപാദനവും ഓർമശക്തിയുമായി ബന്ധപ്പെട്ട തലച്ചോറിന്റെ പ്രവർത്തനങ്ങളും വർധിക്കുന്നുമുണ്ട്. എന്നാൽ, വിശ്രമമില്ലാത്ത ജീവിതരീതികളാണ് പലപ്പോഴും വ്യക്തികളെ അനാരോഗ്യങ്ങളിലേക്ക് നയിക്കുന്നത്. സ്ഥിരമായി ഉറക്കക്കുറവ് അനുഭവിക്കുന്ന വ്യക്തികളിൽ പലതരത്തിലുള്ള കണ്ടു ആരോഗ്യ പ്രശ്നങ്ങൾ വരുന്നുണ്ട്.

സാധാരണ കണ്ടുവരുന്ന തലവേദന മുതൽ ഹൃദ്രോഗം വരെ ഉറക്കക്കുറവുമൂലം സംഭവിക്കാം. പൊണ്ണത്തടി, ത്വഗ് രോഗങ്ങൾ, കാഴ്ചപ്രശ്നങ്ങൾ, തുടർച്ചയായ ജലദോഷം, ശരീരവേദന, സന്ധികളിലെ വേദന, ലൈംഗിക പ്രശ്നങ്ങൾ, പ്രമേഹം, രക്തസമ്മർദം, ദഹനസംബന്ധ രോഗങ്ങൾ തുടങ്ങിയവയെല്ലാം ദീർഘകാലത്തേക്ക് ഉറക്കക്കുറവ് അനുഭവിക്കുന്ന വ്യക്തികളെ ബാധിച്ചേക്കാം.