'നായകനാകുന്നത് ഭാഗ്യമാണെന്ന് തോന്നുന്നില്ല

'കിഷ്കിന്ധാ കാണ്ഡ'ത്തിലെ അപ്പുപിള്ളയിലൂടെ അഞ്ഞൂറാന്റെ തലപൊക്കമുള്ള കഥാപാത്രം തിരിച്ചുവന്നതിന്റെ ത്രില്ലിലാണ് പ്രേക്ഷകർ. കഥാപാത്രങ്ങളിൽനിന്ന് കഥാപാത്രങ്ങളിലേക്ക് അഭിനയത്തികവിന്റെ അമ്പതാണ്ടും പിന്നിട്ട് വിജയരാഘവൻ യാത്ര തുടരുകയാണ്...

- സിദ്ദീഖ് പെരിന്തൽമണ്ണ

നാടകത്തിന്റെ നടവഴികളിലൂടെ നടന്നെത്തിയ നടനാണ് വിജയരാഘവൻ. നാടകാചാര്യനായ അച്ഛൻ എൻ.എൻ. പിള്ളയുടെ നാടക സർവകലാശാല തന്നെയായിരുന്നു കളരി. പിന്നീട് സിനിമയിലെത്തി അമ്പതാണ്ടിനുശേഷവും കിഷ്കിന്ധാ കാണ്ഡ'ത്തിലെ അപ്പുപിള്ള പോലുള്ള കഥാപാത്രങ്ങളിലൂടെ അത്ഭുതപ്പെടുത്തിക്കൊണ്ടിരിക്കുകയാണ്. നാട്, വീട്, കുടുംബം, സിനിമ എന്നിവയെക്കുറിച്ച് ‘മാധ്യമം കുടുംബവുമായി സംസാരിക്കുന്നു.

"അച്ഛനായിരുന്നു അവസാന വാക്ക്

അച്ഛനുമായി സൗഹൃദത്തിലായിരുന്നെങ്കിലും തോളിൽ കൈയിട്ടു നടക്കുന്നതു പോലുള്ള ഫ്രണ്ട്ഷിപ് ആയിരുന്നില്ല. അച്ഛന് ബഹുമാനം നൽകിക്കൊണ്ടുള്ള സൗഹൃദം. അച്ഛൻ പറയുന്നതിനപ്പുറം ഞാൻ നടന്നിരുന്നില്ല. എന്തു കാര്യങ്ങളും ചോദിച്ചിട്ടേ ചെയ്തിരുന്നുള്ളൂ. അച്ഛൻ നോ എന്ന് പറയുന്ന കാര്യം ചെയ്യാറുമില്ല.

ഒരു ഉദാഹരണമുണ്ട്, ഞങ്ങളുടെ വീടിന് അടുത്ത് ഒരു സ്ഥലം വിൽപനക്കുവെച്ചു. ആ സ്ഥലത്തോട് മാനസിക അടുപ്പമുള്ളതിനാൽ ഞാനത് വാങ്ങാൻ തീരുമാനിച്ചു. എന്നാൽ, അച്ഛനാണെങ്കിൽ അങ്ങനെ സ്ഥലം വാങ്ങുന്നതിനോടൊന്നും താൽപര്യമില്ല.

ഞാൻ അച്ഛന്റെ അടുത്തു ചെന്ന് പ്രധാനപ്പെട്ട ഒരു കാര്യം പറയാനുണ്ടെന്ന് പറഞ്ഞു. നോ എന്ന് പറഞ്ഞാൽ ഞാൻ ചെയ്യില്ലെന്നും പക്ഷേ അച്ഛൻ നോ പറയരുതെന്നും പറഞ്ഞു. അങ്ങനെ പറയാൻ പറ്റില്ലെന്ന് അച്ഛനും. പറഞ്ഞ കാര്യം അവർത്തിച്ചപ്പോൾ നി ആലോചിച്ചിട്ടാണോ, എന്നാൽ ശരി എന്ന് അച്ഛൻ ഒടുവിൽ ഞാൻ കാര്യം പറഞ്ഞു.

അങ്ങനെ അച്ഛനോട് ചോദിക്കാതെ ഒരുകാര്യം ചെയ്യാൻ എനിക്ക് മടിയായിരുന്നു. അച്ഛനോട് അത്തരത്തിലുള്ള ബന്ധമായിരുന്നു ഞങ്ങൾ മക്കൾക്ക്. എന്റെ മക്കൾ എന്നോടും അങ്ങനെതന്നെയാണ്. ചോദിച്ചിട്ടേ ചെയ്യാറുള്ളൂ.

ഇഷ്ടം നാടും വീടും