કચ્છની તમામ ૬ બેઠકો ઉપર ત્રિપાંખિયો જંગ થશે

માંડવી, અબડાસા અને રાપરની બેઠકોનો જંગ વધુ રસાકસીભર્યો બનશે. જ્યારે અંજાર, ગાંધીધામ અને ભુજની બેઠક કોંગ્રેસ, આપ માટે કપરાં ચઢાણ, ભાજપને મુશ્કેલીઓ ઓછી રહેવાના આસાર

- સુચિતા બોઘાણી કનર

વિધાનસભાની ચૂંટણીને ગણતરીના દિવસો બાકી છે ત્યારે ચૂંટણીનો ગરમાવો વધી રહ્યો છે. ભાજપનો ગઢ મનાતા કચ્છ જિલ્લામાં આ વખતે આમ આદમી પાર્ટી પણ કાઠું કાઢી રહી હોવાનું લાગી રહ્યું છે. તેથી દર ચૂંટણી વખતે ભાજપ અને કોંગ્રેસ વચ્ચે ખેલાતો દ્વિપાંખિયો જંગ આ વખતે ત્રિપાંખિયો બનશે. ચૂંટણી પરિણામો પર અપક્ષોની ઉમેદવારી પણ અસર કરશે તેવું હાલનું ચિત્ર જોતા લાગી રહ્યું છે. રાજકીય વિશ્લેષકોના મતે અંજાર, ગાંધીધામ અને ભુજ ભાજપની સીટ હોવાનું મનાય છે અને તે મુજબ જ આ વખતે આ સીટો ભાજપને ફાળે જશે, પરંતુ તે માટે તેણે કપરાં ચઢાણ ચડવા પડશે. જ્યારે માંડવી, અબડાસા અને રાપરની સીટો જીતવા માટે ભાજપ સહિત તમામ પક્ષોએ એડીચોટીનું જોર લગાવવું પડશે. આમ છતાં અહીં કોણ જીતશે, તેની આગાહી કરવી અઘરી બની રહી છે.

આજે ચૂંટણી પ્રજાની સમસ્યાઓ, વિકાસ જેવા મહત્ત્વના મુદ્દાઓના બદલે જ્ઞાતિ જેવા મુદ્દાઓ આધારે લડાઈ રહી છે. સામાન્ય રીતે મોટા ભાગની ચૂંટણી વખતે ૫ સીટ ભાજપને અને ૧ સીટ કોંગ્રેસને, એવું સમીકરણ ગત ૨૦૧૭ની ચૂંટણીમાં બદલાયું હતું. ગત વિધાનસભાની ચૂંટણીમાં કોંગ્રેસને બે સીટ મળી હતી. આ વખતે આપ પણ જોર કરી રહ્યું હોવાથી કોને કેટલી સીટ મળશે, તેનું ગણિત ગણવામાં જાણકારો પણ માથું ખંજવાળી રહ્યા છે.