વિઝા વિમર્શ

૯/૧૧ની અસર (અમેરિકા અને આપણે)

- ડો.સુધીર શાહ

૯/૧૧ની આતંકવાદી હુમલાઓએ અમેરિકાને જબરજસ્ત લપડાક મારી.  આવું ભયંકર કૃત્ય કોઈ આચરી શકે એવું અમેરિકાએ તો શું વિશ્વના કોઈ જ દેશે વિચાર્યું નહોતું. આ હુમલાના કારણે અમેરિકાની ઇમિગ્રેશનની નીતિ જે ત્યાં સુધી હળવી હતી, તેઓના કાયદાઓ ફક્ત વ્યક્તિ અમેરિકા માં પ્રવેશવા યોગ્ય છે કે નહીં એ જાણવા માટેના જ હતા અને અમેરિકામાં અમુક સંખ્યામાં લોકો પ્રવેશે, અમેરિકાને ઓવર ક્રાઉડેડ ન કરી ન નાખે એવા જ હતા, પણ હવેથી આ આતંકવાદી હુમલાને કારણે અમેરિકાની ઇમિગ્રેશનની નીતિ સાવ બદલાઈ ગઈ. આ આતંકવાદીઓ સ્ટુડન્ટ વિઝા ઉપર અમેરિકામાં પ્રવેશ્યા હતા. આથી થોડો સમય સુધી અમેરિકાએ સ્ટુડન્ટ વિઝા આપવાનું જ બંધ કરી દીધું. એમણે એમની ખુલ્લા દ્વારની નીતિ બંધ દરવાજામાં ફેરવી નાખી.

વર્ષો જૂની ‘ઇમિગ્રેશન એન્ડ નેશનાલિટી સર્વિસીસ, આઈએનએસ’ નાબૂદ કરવામાં આવી અને એની જગ્યાએ ‘હોમલૅન્ડ સિક્યૉરિટી' ખડી કરવામાં આવી. એ માટે વર્ષ ૨૦૦૨માં ‘હોમલૅન્ડ સિક્યૉરિટી ઍક્ટ ઘડવામાં આવ્યો. ત્યાર બાદ વર્ષ ૨૦૦૨માં ‘ફૅમિલી સ્પોન્સર ઇમિગ્રેશન ઍક્ટ’ તેમ જ ‘ચાઇલ્ડ સ્ટેટસ પ્રોટેક્શન ઍક્ટ’, જેના દ્વારા પરદેશીઓને અનહદ ફાયદો થયો છે એ ઘડવામાં આવ્યા.