વાયરલ પેજ

ઇતિહાસ : ઘટના પાછળનું અર્થઘટન

- સ્પર્શ હાર્દિક

માણસના અંગત જીવનની વાત હોય તો સામાન્યતઃ વીતી ગયેલું ભૂલી જઈને ભાવિ પર નજર નાખવામાં જ ભલાઈ છે એવી નસીહત અપાય છે. કિન્તુ સમાજ કે રાષ્ટ્રની વાત આવે ત્યારે અતીત કે ઇતિહાસ એના અસ્તિત્વના મજબૂત પાયા તરીકે વર્તે છે. ઇતિહાસનો અર્થ આપણે શાળાજીવનમાં ભણી ચૂક્યા છીએ. ઇતિ (આ પ્રમાણે), હ (ખરેખર) અને આસ/અર્ (હતું) એકઠા મળીને ઇતિહાસ બને છે.અલબત્ત, ઇતિહાસ જ્યારે અતીતના બાકી વધેલા અવશેષોમાંથી સર્જવાનો હોય ત્યારે ખરેખર શું હતું એના કરતાં એ અવશેષોનાં અર્થઘટનો અધિક મહત્ત્વના લેખાય છે. આજે આપણે એવી દુનિયામાં જીવીએ છીએ જ્યાં આકાર લેતું કશું પણ રિકૉર્ડ કરીને સાચવવું કે ફેલાવવું અત્યંત સરળ બન્યું છે, તો પણ ફેંક ન્યૂઝ વિકરાળ પ્રશ્ન બન્યો છે અને ફૅક્ટ ચૅક કરીને સત્ય તારવવું પડે છે. અત્યારે ઘટતીઘટનાઓમાં પણ જો જૂઠાણાંઓની જીવાત ખદબદતી હોય, તો વર્ષો કે સદીઓ પહેલાંના ઇતિહાસને શોધવાની પ્રક્રિયા દરમિયાન પણ કેટલીયે ક્ષતિઓ રહી જ જતી હશે.