બિંજ-થિંગ

સો ટકા સાચું બોલતો અરીસો : અરનમૂલા કન્નાડી

- પ્રિયંકા જોષી..

એ ‘સ્વ’ સાથે સેતુ રચી આપે છે. સતત બહારની દુનિયાને નીરખતી આંખોને અંતરમાં ડોકિયું કરવાની કેડી કરી આપે છે. રોજિંદા વપરાશની સ્થૂળ ચીજ હોવા છતાં અરીસો કેવો સજીવ પાત્ર સામો લાગે છે! તે વ્યક્તિને જીવંત હોવાની ધરપત આપે છે. અરીસો જાદુઈ છે, અરીસામાં નીરખતાં ધીરે-ધીરે વ્યક્તિત્વના અજાણ્યા રહસ્ય ખૂલતાં જાય છે. જોનાર પોતાને પ્રેમ કરતો થઈ જાય છે. નાના-મોટા સહુએ આવો અનુભવ કર્યો હશે. કોઈને કહી ન શકાય એવા અનેક ભાવોને સાચવીને બેઠેલો અરીસો વિષાદી ક્ષણોમાં વફાદાર સાથી બને છે.

માણસે સૌ પ્રથમ પોતાનું પ્રતિબિંબ પાણીની ચંચળ સપાટી પર જોયું હશે, ત્યારે તેને એ છબીને સ્થિર કરીને નીરખવાનું અને પછી સંઘરી રાખવાનું મન થયું હશે. એ પછી સદીઓની મથામણોને પરિણામે એ સફળ થયો અને આજે તે આપણાં જીવનનો અભિન્ન હિસ્સો બની ચૂક્યો છે.

કહેવાય છે કે સામાન્ય રીતે વ્યક્તિ જ્યારે અરીસામાં પોતાને જુએ છે ત્યારે તેમાં દેખાતા પ્રતિબિંબમાં દસ ટકા વાસ્તવ અને બાકીના નેવું ટકા તેની કલ્પના રહેલી હોય છે, પરંતુ આ માત્ર મનોવૈજ્ઞાનિક તથ્ય નથી. સામાન્ય રીતે આપણે જેનો ઉપયોગ કરીએ છીએ તે અરીસો પણ સો ટકા સાચું પ્રતિબિંબ દર્શાવતો નથી એ પણ હકીકત છે. તો પછી ૧૦૦% સાચું બોલતું દર્પણ ક્યાંય છે ખરું? તેનો હકારાત્મક જવાબ છે, કેરળનો પ્રસિદ્ધ ધાતુ નિર્મિત દર્પણ ‘અરનમૂલા કન્નાડી’.