മിത്തല്ലാ മുത്താണേ

നാരായണ! നാരായണ!!

- സുന്ദർജി

കൈലാസത്തിൽ ഒരു സാദാ മോണിംഗ് സീനാണ് ഓപ്പണിംഗ്. പരമ ശിവന്റെ കർക്കിടക രാമായണ വായന. ശേഷം  യോഗനിദ്ര. " നീലലോഹിതം നിജ ഭർത്താരം വന്ദിച്ച് അകത്ത് അടുക്കളയിൽ ബ്രേക്ക് ഫാസ്റ്റ് ഉണ്ടാക്കുന്ന തിരക്കിലാണ് ശ്രീമതി പാർവ്വതി (തിരുവോത്ത്). ഗണേശൻ ഡൈനിംഗ് ടേബിളിൽ ആകെ കലിപ്പിലാണ്. അമ്മ ഉണ്ടാക്കി കൊണ്ടുവന്ന ചൂടുമോദകം ഷോട്ട്പുട്ട് മത്സരത്തിലെന്ന പോലെ ഒറ്റയേറ്. ചെന്നത് കൊണ്ടത് മുരുകന്റെ മയിലിന്റെ തലയ്ക്ക്. മയിൽ വെപ്രാളത്തിൽ ചാടിപ്പറന്ന് ചിറകിട്ടടിച്ചു. ശബ്ദം കേട്ട് പേടിച്ച് ശിവന്റെ കഴുത്തിലെ പാമ്പ് പത്തി വിടർത്തി. പത്തി കണ്ടതോടെ മൂഷികൻ ഗണപതിയുടെ പിൻഭാഗത്താളിച്ചു. രംഗം പന്തിയല്ല എന്നു കണ്ട് നന്ദിക്കാള വാലുപൊക്കി ഓടി. ശിവന്റെ യോഗ നിദ്ര മാത്രം ഭംഗമില്ലാതെ തുടർന്നു.

എന്താ ഗണേശാ ഇത്. മോദകമല്ലേ നിന്റെ ഇഷ്ട വിഭവം. നീ മോദകപ്രിയനല്ലേ. ഞാൻ സ്പെഷ്യലായി നിനക്കു വേണ്ടി അകത്ത് തേങ്ങായും ശർക്കരയും ഒക്കെ നിറച്ച് ഉണ്ടാക്കിയതാ. അതാണോ നീ എറിഞ്ഞു കളിക്കുന്നത്. പാർവതി പരിഭവിച്ചു. ഗംഗ പതുക്കെ ജടക്കുളളിൽ നിന്നും തല പൊക്കി രംഗനിരീക്ഷണം നടത്തി. നിഗമനത്തിലെത്തി.

"ഓ! അവളുടെ ഒരു മോദകം. ഞാനൊണ്ടാക്കിയാൽ ഗണേശൻ നാലെണ്ണം കൂടുതൽ തിന്നും. ഓ അതിനൊക്കെ ഒരു കൈപ്പുണ്യം വേണം. ഗംഗ കുറച്ചു വെള്ളം പാർവതിയുടെ മോദകക്കൂട്ടിലേക്ക് ഷട്ടർ തുറന്ന് വിട്ടു. ഇനി കാണാം പുരം.