ઘરવિહોણા લોકોની વહારે પોલીસ આવીઃ કાતિલ ઠંડીમાં રસ્તા પર સૂતેલા લોકોને ધાબળા આપ્યા

જેસીપી અજય ચૌધરીએ ટીમ સાથે મળીને બજાર અને સિવિલ હોસ્પિટલ કેમ્પસ, ગુજરી દૂધેશ્વરબ્રિજ નીચે ૧૦૦ ધાબળા આપ્યા

પોલીસનું નામ સાંભળતાંની સાથે જ લોકોના દિમાગમાં હાથમાં ડંડો અને મોઢા પર ગુસ્સો હોય તેવું એક ચિત્ર ઊભું થાય છે, પરંતુ હકીકત તેના વિપરીત છે. ગુનેગારો માટે કાળ બનીને ત્રાટકતી પોલીસ ગરીબો તેમજ ઘરવિહોણા લોકો માટે ભગવાન બનીને વહારે આવી છે. અમદાવાદ પોલીસના એક જાંબાઝ અધિકારીએ રોડ પર સૂઈ રહેલા ૧૦૦ લોકોને ધાબળા આપીને સેવા પરમો ધર્મના સ્લોગનને સાર્થક કર્યું છે. પોલીસ અધિકારીની આ કામગીરી જોઇને બીજા અનેક પોલીસ કર્મચારીઓને પણ પ્રેરણા મળી છે અને તેઓ પણ આવનારા દિવસોમાં ગરીબોને રજાઇ, ધાબળા, સ્વેટર આપે તેવું નક્કી કર્યું છે.