ഇത് ദക്ഷിണകാശിയാണ്....

പിതൃക്കൾക്ക് ആത്മശാന്തി ലഭിക്കാനാണ് വിശ്വാസികൾ ബലിയിടൽ നടത്തുന്നത്

- അനീഷ് മോഹനചന്ദ്രൻ

ഒരിക്കൽ വന്നാൽ പിന്നെയും വരാൻ തോന്നും. ഒരിക്കൽ തൊഴുതാൽ, തൊഴുതാലും തൊഴുതാലും തീരുകയില്ല. ത്രിമൂർത്തികളിൽ സ്ഥിതിപരിപാലനത്തിന്റെ ഈശനായ മഹാ വിഷ്ണു ഇവിടെ ജനാർദ്ദനസ്വാമിയാണ്. സ്വാമിയുടെ മുന്നിൽ നിന്ന് ഉള്ളുരുകി പ്രാർത്ഥിച്ചാൽ ആ വിളി ഭഗവാൻ കേൾക്കും. അതല്ലെങ്കിലും അങ്ങനെയാണല്ലോ. ഭക്തരുടെ അഭീഷ്ടസിദ്ധിക്കായി ഭഗവാൻ എന്നും എപ്പോഴും വിളിപ്പുറത്ത് ഉണ്ടാകും. അത് ഏത് ദേവസ്ഥാനത്തായാലും അങ്ങനെ തന്നെ. എന്നാൽ വർക്കല ജനാർദ്ദനസ്വാമി ക്ഷേത്രത്തിലെ വിഷ്ണുരൂപത്തിന് തെല്ലൊരു പ്രത്യേകതയുണ്ട്. തന്റെ മുന്നിൽ നിൽക്കുന്ന ഓരോ ഭക്തരേയും ഭഗവാൻ സ്നേഹവാത്സല്യത്തോടെ തലോടുന്നതായി തോന്നാറുണ്ടെന്ന് ഇവിടെത്തുന്ന ഭക്തർ സാക്ഷ്യപ്പെടുത്തുന്നു. 2000 ഓളം വർഷം പഴക്കമുണ്ടെന്ന് കരുതപ്പെടുന്ന ഈ ക്ഷേത്രം വർക്കല ബീച്ചിന് സമീപത്തെ ഒരു കുന്നിൻ മുകളിലാണ് സ്ഥിതി ചെയ്യുന്നത്. തിരുവനന്തപുരം ജില്ലയിലെ പ്രധാന ബലിയിടൽ കേന്ദ്രങ്ങളിൽ ഒന്നാണ് വർക്കല പാപനാശം കടൽത്തീരം. കർക്കിടക വാവുബലിക്കായി പ്രതിവർഷം പതിനായിരങ്ങളാണ് ഇവിടേക്ക് ഒഴുകി എത്തുന്നത്.