ബൗളിങ്ങിലെ വിപ്ലവകാരി

ഇന്ത്യൻ ഫാസ്റ്റ് ബൗളിങ് വിപ്ലവത്തിന്റെ പതാകവാഹകനായിരുന്നു കപിൽദേവ്. ഇന്ത്യൻ ക്രിക്കറ്റിൽ ഫാസ്റ്റ് ബൗളിങ്ങിന് പ്രസക്തിയില്ല എന്ന മിഥ്യാധാരണയുടെ മാനസിക തടസ്സത്തെ മറികടക്കുക എന്നതായിരുന്നു കപിലിന്റെ ആദ്യ വെല്ലുവിളി

- പി. ബാലചന്ദ്രൻ

അൻപത് വർഷത്തിലേറെയായി ഇന്ത്യൻ ക്രിക്കറ്റിനെയും ലോകക്രിക്കറ്റിനെയും സൂക്ഷ്മമായി നിരീക്ഷിക്കുന്ന ആളെന്ന നിലയിൽ വിവിധ ഘട്ടങ്ങളിലായി ഈ രംഗത്ത് സംഭവിച്ചു കൊണ്ടിരിക്കുന്ന മാറ്റങ്ങളെ കൗതുകത്തോടെയാണ് കാണുന്നത്. ക്രിക്കറ്റ് ലോകത്തിലെ മുടിചൂടാമന്നന്മാരായി വാണ ടീമുകളുടെ പതനവും കീഴാളന്മാരായി പരുങ്ങിയിരുന്ന ടീമുകൾ കുതിച്ചുയർന്ന് മുൻനിരയിലേക്കെത്തുന്നതും ക്രിക്കറ്റ് ചരിത്രത്തിലുണ്ടായ യാഥാർഥ്യങ്ങളാണ്.

ഈയടുത്ത് സമാപിച്ച ഐ.പി.എൽ. മത്സരങ്ങൾ വീക്ഷിച്ചതിന്റെ വെളിച്ചത്തിലാണ് ചെറിയൊരു ആമുഖം മേലെ കുറിച്ചത്. കളിക്കാരുടെ മികവിന്റെ അളവുകോലാണ് ട്വന്റി ട്വന്റി മത്സരങ്ങൾ എന്ന വിശ്വാസം എനിക്കില്ല. എന്നാൽ ഞാൻ അദ്ഭുതത്തോടെ ശ്രദ്ധിച്ചത് ഇന്ത്യൻ ഫാസ്റ്റ്ബൗളർമാരുടെ പ്രകടനമാണ്. നൂറ്റിയൻപത് കിലോമീറ്റർ വേഗത്തെക്കാൾ അപ്പുറം ബൗൾ ചെയ്യുന്ന ഉംറാൻ മാലിക്ക്, ജസ്പ്രീത് ബുംറ എന്നിവർ; ശരാശരി നൂറ്റിനാപ്പത്തിയഞ്ച് കിലോമീറ്റർ വേഗത്തിൽ ബൗൾ ചെയ്യുന്ന ഉമേഷ് യാദവ്, മുഹമ്മദ് ഷമി തുടങ്ങിയവർ; തുടർച്ചയായി നൂറ്റി നാല്പത് കിലോമീറ്ററിലേറെ വേഗത്തിൽ ബൗൾ ചെയ്യുന്ന ആവേഷ്ഖാൻ, ഭുവനേശ്വർ കുമാർ, ബേസിൽ തമ്പി പ്രതിഭകൾ! ഇവർക്ക് പുറമേ ടെസ്റ്റ് ക്രിക്കറ്റിൽ എതിർ ബാറ്റ്സ്മാന്മാരെ കഷ്ടപ്പെടുത്തുന്ന ഇഷാന്ത് ശർമ! ഇന്ത്യൻ വർത്തമാന ഫാസ്റ്റ് ബൗളിങ് വിഭാഗം സമ്പന്നമാണ് എന്ന് സമ്മതിക്കാതെ വയ്യ!