മെസ്സിഹാസം

ഫുട്ബോളിൽ ഇതിഹാസങ്ങൾ ഒരുപാടുണ്ടാകാം. എന്നാൽ ഒരേയൊരു മെസ്സിയേയുള്ളൂ. ആരാധകർ നെഞ്ചിലേറ്റിയ അനശ്വരജൻമം

- ആർ. ഗിരീഷ്കുമാർ

മനുഷ്യന്റെ ചിന്തകൾക്കും ഭാവനകൾക്കുമൊക്കെ അതിരുകളുണ്ട്. കവിഭാവന അങ്ങനെയല്ലെങ്കിലും. എത്രയെഴുതിയാലും എത്ര വർണിച്ചാലും വാക്കുകൾ പരിമിതമാകുന്ന ചില യാഥാർഥ്യങ്ങളുണ്ട്. ലയണൽ മെസ്സി അങ്ങനെ കവിതയ്ക്കു പുറത്തായ യാഥാർഥ്യമാണ്. മനുഷ്യസാധ്യമായ വാഴ്ത്തുപാട്ടുകളൊക്കെ ആ കാൽച്ചുവടുകളിൽ എന്നേ വീണടിഞ്ഞു. എന്തെഴുതിയാലും അതൊക്കെ അപ്രസക്തമാക്കുന്ന, മഴവില്ലഴകുള്ള മറ്റൊരു ഫ്രീക്കിക്ക് ആ ഇടംകാലിൽനിന്ന് പിറവികൊള്ളും. എല്ലാ വിലയിരുത്തലുകളും അപ്രസ ക്തമാക്കുന്ന മാന്ത്രികനെയാണ് നാം സാങ്കേതികത്തികവിന്റെ ചതുരക്കള്ളികളിൽ ഒതുക്കാൻ ശ്രമിക്കുന്നത്.

അല്ലെങ്കിൽ, ജൂലിയൻ അൽവാരസിനോടു ചോദിക്കൂ. വേണ്ട, ഒപ്പമോടി തോറ്റവനെന്ന് ഇനിയുള്ള കാലമത്രയും അഹങ്കരിക്കാൻ പോകുന്ന ക്രൊയേഷ്യക്കാരൻ ജോസ്കോ ഗ്വാർഡിയോളിനോട് ചോദിക്കൂ. ലോകകപ്പിന്റെ സെമിഫൈനലിൽ പിറന്ന ആ  സമ്മോഹനമുഹൂർത്തത്തിന്റെ നേർസാക്ഷിയാവാൻ ഭാഗ്യം കിട്ടിയയാൾ എന്നാകും ഗ്വാർഡിയോൾ ചിലപ്പോൾ സ്വയം വിലയിരുത്തുക. മധ്യനിരയിൽനിന്ന് മെസ്സി കുതിക്കുമ്പോൾ, ഒരനക്കം കൊണ്ടുപോലും ആ കുതിപ്പിനെ തടയാൻ ഗ്വാർഡിയോളിന് കഴിഞ്ഞില്ല. ചിലപ്പോൾ ആ കാലുകളുടെ സുന്ദരചലനങ്ങൾ അയാൾ ആസ്വദിച്ചുപോയിരിക്കാം. ഒടുവിൽ ഗോൾ മുഖത്ത് ഒരു തലോടൽകൊണ്ട് പന്തിനെ വലയിലേക്ക് തട്ടിയിടാൻ നിയോഗിക്കപ്പെട്ട അൽവാരസും ആ നീക്കത്തിന്റെ കണ്ണിയായി. മെസ്സിയുടെ കളിയഴകിൽ ഭ്രമിച്ചുപോകാതെ, ആ പന്തിനെ ലക്ഷ്യത്തിലെത്തിക്കാൻ അൽവാരസിനെ പ്രാപ്തനാക്കിയിരിക്കുക ഇത്രയും കാലം ആവർത്തിച്ചാവർത്തിച്ചു കണ്ടു മനപ്പാഠമാക്കിയ അനേകമനേകം മെസ്സി നീക്കങ്ങളാകാം.

ഖത്തർ ലോകകപ്പ് മെസ്സിയുടെ കളിയ ഴകിന്റെ പ്രദർശനവേദിയായിരുന്നു. മെസ്സി മുഹൂർത്തങ്ങൾ കോർത്തിണക്കിയ നൃത്ത ശില്പം.