വേദനിപ്പിച്ച് വൂമർ

2007 ലോകകപ്പ് സംഭവബഹുലമായിരുന്നു. ഇന്ത്യയും പാകിസ്താനും ആദ്യ റൗണ്ടിൽ തന്നെ പുറത്തായി. പക്ഷെ, ആ പരാജയങ്ങളേക്കാൾ വിൻഡീസ് ലോകകപ്പിനെ പിടിച്ചുകുലുക്കിയത് പാകിസ്താൻ പരിശീലകൻ ബോബ് വൂമറുടെ മരണമായിരുന്നു. ചുരുളഴിയാത്ത രഹസ്യമായി ആ മരണം ഇന്നും നിലനിൽക്കുന്നു

- കെ. സുരേഷ്

ലോക ക്രിക്കറ്റിൽ ഏറ്റവും വലിയ നടുക്കം സൃഷ്ടിച്ചത് ഇംഗ്ലീഷുകാരനായ ബോബ് വൂമറാണ്. മികച്ച ഇന്നിങ്സിലൂടെയോ ഞെട്ടിക്കുന്ന ബൗളിങ് പ്രകടനത്തിലൂടെയോ അല്ലായിരുന്നു അത്. കളിക്കളത്തിൽ നിന്ന് പിരിഞ്ഞ് 36 വർഷത്തിനുശേഷം ഒരു പുലർച്ചെ, പൂമർ ലോകത്തിന്റെ നടുക്കവും വേദനയുമായി. 2007 മാർച്ച് 18-ന് പുലർച്ചെ ക്രിക്കറ്റിലെ ഏറ്റവും വലിയ ആഘോഷമായ ലോകകപ്പ് നടന്നുകൊണ്ടിരിക്കേ, ജമൈക്കയിലെ ഒരു ഹോട്ടൽ മുറിയിൽ വൂമർ ജീവനറ്റ് കിടന്നു. അപ്പോൾ പാകിസ്ഥാൻ  ക്രിക്കറ്റ് ടീമിന്റെ പരിശീലകനായിരുന്നു അദ്ദേഹം. ഇംഗ്ലണ്ടിന്റെ മുൻ താരം, ദക്ഷിണാഫ്രിക്കയുടെ മുൻ പരിശീലകൻ തുടങ്ങി പല മേൽവിലാസങ്ങളുണ്ടായിരുന്നു ബോബ് വൂമർ എന്ന ഓൾറൗണ്ടർക്ക്. പക്ഷേ അകാലത്തിലുള്ള മരണം വൂമറെ ചോദ്യങ്ങളുടെ നടുവിലാക്കി.

2007-ൽ വെസ്റ്റ് ഇൻഡീസ് ആതിഥേയത്വം വഹിച്ച ലോകകപ്പ് ക്രിക്കറ്റ് മത്സരം നടന്നുകൊണ്ടിരിക്കേയാണ് ആ മരണമുണ്ടായത്. അത് കൊലപാതകമോ ആത്മഹത്യയോ സ്വാഭാവിക മരണമോ എന്ന് ഇന്നും തെളിഞ്ഞിട്ടില്ല. ലോകത്തെ പ്രമുഖ അന്വേഷണ സംഘത്തിന്റെ പരിശോധനകളിൽ മരണമാണെന്ന് തെളിയിക്കുന്ന തെളിവുകളൊന്നും കണ്ടെത്താനായില്ല. പക്ഷേ സംശയത്തിന്റെ മുറിപ്പാടുകൾ മാഞ്ഞതുമില്ല. കഴുത്തു ഞെരിച്ച പാടുകളുള്ളതായി വാർത്തകളുണ്ടായി. ലോകപ്രശസ്ത അന്വേഷണ സംഘമായ സ്കോട്ലൻഡ് യാർഡിലെ ഉദ്യോഗസ്ഥനായിരുന്ന മാർക് ഷീൽഡ്സിന്റെ നേതൃത്വത്തിലുള്ള സംഘമാണ് കേസ് അന്വേഷിച്ചത്.

ഭാര്യ ഗിൽ വൂമർ പറഞ്ഞു "ജമൈക്കൻ പോലീസ് എല്ലാ കഴിവും ഉപയോഗിച്ച് അന്വേഷണം നടത്തി. അതിനൊടുവിൽ ബോബ് റൂമറുടേത് സ്വാഭാവിക മരണമായിരുന്നുവെന്നാണ് കണ്ടത്തിയത്. അത് വിശ്വസിക്കാനാണ് എനിക്കിഷ്ടം. ഞാനും എന്റെ മക്കളും അതിൽ ആശ്വാസം കണ്ടെത്തുന്നു.