ബ്രൂണോ ദ മജീഷ്യൻ

ബ്രൂണോ ഫെർണാണ്ടസാണ് പോർച്ചുഗൽ മധ്യനിരയുടെ മിടിപ്പ് ക്രിയാത്മകമായ പാസുകളും മുന്നേറ്റങ്ങളും ബ്രൂണോയെ വേറിട്ടുനിർത്തുന്നു. ഖത്തറിൽ പോർച്ചുഗൽ സ്വപ്നം കാണുന്നത് ബ്രൂണോയുടെ ബൂട്ടുകളിലാണ്

- വിഷ്ണു രാമകൃഷ്ണൻ

ഗോളടിച്ചത് ബ്രൂണോ ഫെർണാണ്ടസോ ക്രിസ്റ്റ്യാനോ റൊണാൾഡോയോ ? ഗ്രൂപ്പ് എച്ചിലെ പോർച്ചുഗൽ യുറഗ്വായ്  മത്സരശേഷം ആരാധകർ ഒന്നടങ്കം ഉന്നയിച്ച ചോദ്യമാണിത്. ബ്രൂണോ തന്നെയാണെന്ന് ഒരു വിഭാഗം വാദിച്ചപ്പോൾ റൊണാൾഡോയുടെ തലയിൽ കൊണ്ടാണ് ഗോൾ വലയിലേക്കെത്തിയതെന്ന് മറുഭാഗം വിശ്വസിച്ചു. താരത്തിന്റെ ഗോൾ സെലിബ്രേഷൻ സംശയങ്ങളുടെ മുനയൊടിച്ചു. പിന്നാലെ ഫിഫയും ഗോളിന്റെ അവകാശി റൊണാൾഡോ തന്നെയെന്ന് വിധിച്ചു. എന്നിട്ടും ആശയക്കുഴപ്പത്തിന് തീർപ്പ് കല്പിക്കാനാകുന്നില്ല. ഫിഫ വീണ്ടും പുനഃപരിശോധന നടത്തി. ഗോളടിച്ചത് ബ്രൂണോ തന്നെ! വൈകാതെ ഫിഫ തെറ്റുതിരുത്തി ഗോൾ ബ്രൂണോയുടെ പേരിലാക്കി. മത്സരത്തിന്റെ 54-ാം മിനിറ്റിലാണ് ഇടതുവിങ്ങിൽനിന്ന് ബ്രൂണോ ഉയർത്തി നൽകിയ ക്രോസ് യുറഗ്വായുടെ ഗോൾവല ലക്ഷ്യമാക്കി പാഞ്ഞത്. പന്തിനെ വലയിലെത്തിക്കാൻ അന്നേരം റൊണാൾഡോ ഉയർന്നുചാടി. തൊട്ടടുത്ത നിമിഷം പന്ത് വലയ്ക്കകത്ത് കേറുകയും ചെയ്തു. 

90-ാം മിനിറ്റിൽ പെനാൽട്ടിയിലൂടെ രണ്ടാം ഗോളും സ്വന്തമാക്കി ബ്രൂണോ പോർച്ചുഗലിന്റെ വിജയശില്പിയായി. ലോകകപ്പിലെ തന്റെ ആദ്യ ഗോളിന് ഇങ്ങനെയൊരു വിധി വന്നതിൽ ബ്രൂണോ അതിയായി സങ്കടപ്പെട്ടിരിക്കാമെങ്കിലും മത്സരശേഷം അദ്ദേഹത്തിൽനിന്ന് വന്ന വാക്കുകൾ മറ്റൊരു തരത്തിലായിരുന്നു : "ആ ഗോൾ ക്രിസ്റ്റ്യാനോയുടേതായിട്ടാണ് ഞാൻ ആഘോഷിച്ചത്. പന്ത് അദ്ദേഹത്തിന്റെ തലയിൽ തൊട്ടതായി എനിക്ക് തോന്നി. അദ്ദേഹത്തിനു വേണ്ടി (റൊണാൾഡോ) പന്ത് ക്രോസ് ചെയ്ത് നൽകുക എന്നതു മാത്രമായിരുന്നു അന്നേരത്തെ എന്റെ ലക്ഷ്യം. പെനാൽട്ടിയിലൂടെ ബ്രൂണോ രണ്ടാം ഗോളും സ്വന്തമാക്കിയപ്പോൾ ഡഗ്ഔട്ടിലിരിക്കുന്ന റൊണാൾഡോ മതിമറന്ന് ആഹ്ലാദിക്കുകയായിരുന്നു. മാഞ്ചസ്റ്റർ യുണൈറ്റഡിന്റെ രക്ഷകനായി അവതരിച്ച ബ്രൂണോ പോർച്ചുഗലിനെയും കാക്കുന്ന സവിശേഷകാഴ്ച റൊണാൾഡോയിൽ ആഹ്ലാദമുണ്ടാക്കിയില്ലെങ്കിലേ അത്ഭുതമുള്ളൂ!

 മാഞ്ചെസ്റ്ററിലെ മാന്ത്രികൻ