വിജയപുരയുടെ നഗരപാതകളിൽ

വിജയപുരയെന്ന ബിജാപുരിന്റെ ഓർമ്മകൾ നൂറ്റാണ്ടുകൾക്കും പിന്നിലേയ്ക്ക് നീണ്ടുകിടക്കുന്നു. അധികാരത്തേരോട്ടങ്ങൾ ഒരുപാട് കണ്ട നഗരത്തിൽ ഇന്നും ആ ശേഷിപ്പുകൾ തിളക്കമേറി നിൽക്കുന്നു

- AJMAL PAZHERI

ഛായഗ്രാഹകൻ വേണുവിന്റെ സോളോ സ്റ്റോറീസിലാണ് വിജയങ്ങളുടെ നഗരത്തെക്കുറിച്ചുള്ള ആദ്യ വായന. അന്ന് മനസ്സിൽ കയറി കൂടിയതാണ് ഗോൽഗുമ്പസും ജാമിയ മസ്ജിദുമെല്ലാം. പലവട്ടം കർണാടകയിലെത്തിയിട്ടും ഇതാദ്യമായാണ് വിജയപുരമെന്ന ബിജാപുരിലേക്ക്. മംഗലാപുരം-ബിജാപുർ എക്സ്പ്രസ് ബിജാപുർ റെയിൽവേ സ്റ്റേഷനിൽ എത്തുമ്പോൾ രാവിലെ 9.20. കർണാടകയുടെ അതിർത്തിജില്ലകളായ ബിജാപുരിനെയും മംഗലാപുരത്തെയും ദിനവും ബന്ധിപ്പിക്കുന്ന ഏക തീവണ്ടിയാണിത്. ഇരമ്പുന്ന തിരക്കിനിടയിലൂടെ വലിയ ബാഗുകളുമായി ഞങ്ങൾ പുറത്തിറങ്ങി. പുറത്ത് നല്ല ചൂടുണ്ട്. യാത്രക്കാരെ കാത്ത് ഡ്രൈവർമാരുടെ വൻ നിരയുണ്ടായിരുന്നു. ഓട്ടോയും കാറും മാത്രമല്ല, കുതിരവണ്ടിയുമുണ്ട്. ചിലർ ഞങ്ങളുടെ കൈകൾ പിടിച്ച് ആനയിക്കുന്നു. വേറെ ചിലർ ബാഗ് പിടിച്ച് സഹായിക്കുന്നു. എന്നാൽ, കണ്ണുകളെല്ലാം അവിടെയുണ്ടായിരുന്ന കുതിരപ്പട്ടാളത്തിലായിരുന്നു. ഗൂഗിൾ മാപ്പ് നോക്കി ബുക്കുചെയ്ത ഹോട്ടലിലേക്കുള്ള ദൂരമറിഞ്ഞു. ഏഴുകിലോമീറ്ററുണ്ട്. കുതിരവണ്ടിയിൽ പോകൽ അസാധ്യം. കൂട്ടം തെറ്റി നിന്ന ഒരു ഓട്ടോ തിരഞ്ഞെടുത്തു.

ഡ്രൈവർ വണ്ടി തിരിക്കുന്നതിനിടെ റെയിൽവേ സ്റ്റേഷനിലെ ബോർഡ് ശ്രദ്ധയിൽപ്പെട്ടു: “വിജയപുര'. മൂന്നുഭാഷകളിൽ എഴുതിയിട്ടുണ്ട്. കന്നഡ നീലനിറത്തിൽ. ഹിന്ദിക്ക് ചുവപ്പുനിറം. ഇംഗ്ലീഷ് പച്ചയും. ചരിത്രപ്രാധാന്യമുള്ള ബിജാപുർ വിജയ പുര'യാകുന്നത് 2014-ലാണ്. വിജയപുര എന്നാൽ വിജയങ്ങളുടെ നഗരമെന്ന് അർഥം. അല്പം മുന്നോട്ടു കുതിച്ച് ഓട്ടോ സമീപത്തെ ഗ്യാസ് സ്റ്റേഷനിൽ ഇന്ധനം നിറയ്ക്കുന്നതിനായി നിർത്തി. അതിനിടെ ഡ്രൈവർ അടുത്തുവന്ന് സ്വയം പരിചയപ്പെടുത്തി: "ഞാൻ അസീം. നിങ്ങളെക്കണ്ടിട്ട് ടൂറിസ്റ്റുകളാണെന്ന് തോന്നുന്നു. നിങ്ങളെ ബിജാപുർ നഗരം ചുറ്റിക്കറക്കാം. ഓട്ടോയിൽ നിന്ന് ഒരു ഗൈഡും അദ്ദേഹം പുറത്തെടുത്തു. അതിൽ ബിജാപുരിലെ പ്രധാന ടൂറിസ്റ്റ് കേന്ദ്രങ്ങൾ. ഗ്യാസ് നിറച്ചശേഷം അസീം വണ്ടി സ്റ്റാർട്ടുചെയ്തു. ഓട്ടോ ഒരു വളവു തിരിഞ്ഞപ്പോൾ അസീം വലത്തോട്ടു ചൂണ്ടിയിട്ട് പറഞ്ഞു: "ഭായ്, അതാ ഗോൽഗുമ്പസ്. അതാ വിദൂരതയിൽ ഗോൽഗുമ്പസ് നിൽക്കുന്നു. എന്നാൽ, അസീം ഞങ്ങൾക്കായി കാത്തുനിന്നില്ല. വണ്ടിയുടെ വേഗവും കുറഞ്ഞില്ല. കൊതി തീരും മുൻപ് ഗോൽഗുമ്പസ് കാഴ്ചയിൽനിന്ന് മറഞ്ഞു. വരാനിരിക്കുന്ന കാഴ്ചകളു ടെ ട്രെയ്ലറോ ടീസറോ പോലെ.