മഞ്ഞിലൂടെ ആകാശവർണങ്ങൾ തേടി

വൈകുന്നേരം മൂന്നുമണിയാകുമ്പോൾ സൂര്യനസ്തമിക്കുന്ന, പിന്നെ പൂർണമായും ഇരുട്ടിലാവുന്ന ഐസ്ലൻഡിലെ ഗ്രാമത്തിലേക്ക് പോകുമ്പോൾ ഒറ്റലക്ഷ്യം മാത്രമായിരുന്നു ധ്രുവപ്രദേശങ്ങളിൽ മഞ്ഞ് കൂടുതലുള്ള സമയങ്ങളിൽ മാത്രമുണ്ടാവുന്ന നോർത്തേൺ ലൈറ്റ്സ് കാണുക...

- SAMBHU M G

ചെറുക്കനിക്ക് ഭ്രാന്താണ്, 83 വയസ്സുള്ള അമ്മച്ചി തനി നാവായിക്കുളം സ്റ്റൈലിൽ ഉറപ്പിച്ചു കഴിഞ്ഞു. അമേരിക്കയിലെ തണുപ്പ് പോരാഞ്ഞിട്ടാണ് ഇനി ഡിസംബറിൽ ഐസ്ലൻഡിൽ പോകുന്നത്. ഇത് അതുതന്നെ, നട്ടപ്രാന്ത്...''അറോറ ബോറിയാലിസ് എന്ന വട്ടപ്പേരുള്ള നോർത്തേൺ ലൈറ്റ്സ് കാണാനാണ് ഈ യാത്ര. ധ്രുവപ്രദേശങ്ങളിലെ ശൈത്യകാലങ്ങളിൽ മാത്രമേ അത് കാണാൻ പറ്റൂ എന്ന് അമ്മച്ചിക്കറിയില്ലല്ലോ. അമ്മച്ചിക്കുള്ള മറുപടി ഒരു ചിരിയിലൊതുക്കി ഫോൺ വെച്ചു.

യാത്രയ്ക്കുള്ള തയ്യാറെടുപ്പുകളിൽ മുഴുകി. കൂടെ എന്റെ പാർട്ണർ ക്രിസ്റ്റിനുമുണ്ട്. യൂറോപ്പിലേക്കുള്ള മൂന്നാമത്തെ യാത്രയാണെങ്കിലും കഴിഞ്ഞയാഴ്ചത്തെ ഐസ്ലൻഡ് വാർത്തകളും വിന്റർ ഡ്രൈവിങ് പ്രശ്നങ്ങളുമൊക്കെ ചേർന്ന് ഒരു പിരിമുറുക്കമുണ്ട് ഉള്ളിൽ.

യാത്രകളിലെന്നും ലോ കോസ്റ്റ് എയർലൈൻസിനോടുള്ള പ്രണയം ഇത്തവണയും തെറ്റിച്ചില്ല. പ്ലേ എയർലൈൻസ് എന്ന ഐസ്ലൻഡ് ബേസ്ഡ് ലോ കോസ്റ്റ് എയർലൈൻസ് തന്നെ തിരഞ്ഞെടുത്തു. എന്റർടെയിൻമെന്റ് സ്ക്രീൻ ഇല്ലാത്തതുകൊണ്ട് വായന നടക്കും, കീശയും കാലിയാകില്ല. റേവിക് എയർപോർട്ടിലേക്ക് ഇറങ്ങാറായി എന്ന പൈലറ്റിന്റെ അനൗൺസ്മെന്റ് കേൾക്കുമ്പോൾ, "ദി ക്യാച്ചർ ഇൻ ദി റെ ' എന്ന ഇംഗ്ലീഷ് ക്ലാസിക് പകുതിയിലേറെ വായിച്ചു കഴിഞ്ഞിരുന്നു.

മഞ്ഞുപുതഞ്ഞ കറുത്തഭൂമി

 ഫ്ളൈറ്റിലിരുന്നു തന്നെ കാണാമായിരുന്നു ഐസ് പുതച്ചുകിടക്കുന്ന കറുത്ത ഭൂമി. വിമാനത്താവളത്തിൽ നിന്ന് പുറത്തുകടന്ന്, ടാക്സിയിലിരിക്കുമ്പോൾ വരുംദിവസങ്ങളിലെ റോഡിന്റെ അവസ്ഥയെപ്പറ്റി ഒരു ധാരണ ലഭിച്ചു. ട്വിറ്ററിലും  (https://www.road.is/) ഐസ്ലൻഡ് ഗവൺമെന്റ് അറിയിപ്പ് തന്നിരുന്നതുകൊണ്ടുതന്നെ റോഡിന്റെ അവസ്ഥയ്ക്കനുസരിച്ച് യാത്രകൾ പ്ലാൻ ചെയ്യാൻ കഴിഞ്ഞു. മഴക്കാലത്ത് നമ്മുടെ നാട്ടിലിതുപോലൊരു സംവിധാനം ഉണ്ടായിരുന്നെങ്കിൽ എത നന്നായേനെ!

അഗ്നിപർവതം പൊട്ടിത്തെറിച്ചുണ്ടായ ലാവാ ദ്വീപാണ് ഐസ്ലൻഡ്. അതുകൊണ്ടുതന്നെ മണ്ണിനും കല്ലിനുമെല്ലാം കറുപ്പുനിറം. അതിനുമുകളിൽ തൊണ്ണൂറുശതമാനം ഇടങ്ങളിലും മഞ്ഞും തെളിനീല വെള്ളത്തിൽ പതിക്കുന്ന ഉദയസൂര്യന്റെ കിരണങ്ങളുമെല്ലാം ചേർന്നൊരു മനോഹരമായ പകലായിരുന്നു അത്. ആദ്യയാത്ര തിംഗ്വെല്ലിർ നാഷണൽ പാർക്കിലേക്ക്, അമേരിക്കൻ യൂറോപ്യൻ ടെക്റ്റോണിക് പ്ലേറ്റുകളൊന്നിക്കുന്ന ഇവിടം, യുനെസ്കോയുടെ പൈതൃകപ്പട്ടികയിലുൾപ്പെട്ടിട്ടുണ്ട്.