മാമാങ്കമാടിയ മണൽപ്പരപ്പിൽ

നിളയുടെ തീരം കാഴ്ചകളുടേതു കൂടിയാണ്. മാമാങ്കം കൊണ്ടാടിയ മണൽപരപ്പിൽ ഇന്നും ആ ഓർമ്മകളുണ്ട്. ചങ്ങമ്പള്ളി കളരിയും മണിക്കിണറും പഴുക്കാമണ്ഡപവും മാത്രമല്ല പുഴയ്ക്ക് കുറുകെ വീശുന്ന കാറ്റും പറയുന്നുണ്ട് ആ കഥകൾ

- SREELAL A G

ഭാരതപ്പുഴയുടെ ഓരം പറ്റിയാണ് കുറ്റിപ്പുറത്തു നിന്ന് തിരുനാവായയിലേക്കുള്ള പാത. യാത്രയ്ക്കിടയിൽ ജലത്തിളക്കമായും മണൽപ്പരപ്പിലെ പുൽക്കാടുകളായും നിളയങ്ങനെ തെളിഞ്ഞും മറഞ്ഞും കൂടെക്കൂടുന്നുണ്ട്. പോകെ പോകെ നിളാനദിയോട് ഇഷ്ടം തോന്നിത്തുടങ്ങിയാൽ ചെമ്പിക്കലിൽ വണ്ടി നിർത്താം. കുലുക്കി സർബത്തും കട്ടനും ഓംലറ്റും കിട്ടുന്ന കടകൾക്കിടയിലൂടെ പുഴയിലേക്ക് ഒരു ഇടവഴിയുണ്ട്. ഇരുവശത്തും പച്ചപ്പുനിറഞ്ഞ ഒരു മണൽ വഴി. വഴി തീരുന്ന സ്ഥലത്ത് മണൽ പതിയെ പുഴയായിത്തീരുന്നു. അതു പിന്നെ കരയും പിന്നെയത് ആകാശവുമായിത്തീരുന്ന മായക്കാഴ്ച കണ്ട് റോഡിലെ വാഹനങ്ങളുടെ ഇരമ്പലിൽ നിന്നും പുഴയുടെ നിശ്ശബ്ദതയിലേക്ക്... ദൂരെ നീർപ്പക്ഷികളുടെ കരച്ചിൽ മാത്രം ശ്രദ്ധിച്ചാൽ കേൾക്കാം. അത്രയ്ക്ക് ശാന്തമായാണ് നിളയൊഴുകിക്കൊണ്ടിരുന്നത്. (എങ്കിലും അകമേ പുഴയത്ര ശാന്തമല്ല എന്നാണ് മുന്നറിയിപ്പ് പലകകൾ പറയുന്നത്) ഇവിടെ നിന്ന് നോക്കിയാൽ കുറ്റിപ്പു പാലം മുതൽ നാവാമുകുന്ദ ക്ഷേത്രം വരെയുള്ള നിളപ്പരപ്പ് കാണാം. അരവിന്ദന്റെ "തമ്പ് ഇവിടെയാണ് ചിത്രീകരിച്ചത്. ചെമ്പിക്കലിൽ നിന്നും അഞ്ചുമിനിട്ട് ദൂരമേ നാവാമുകുന്ദ ക്ഷേത്രത്തിലേക്കുള്ളു.