ജലപാതം പുതച്ച് അതിരപ്പിള്ളി കാട്ടുവഴിയിലൂടെ

അതിരപ്പിള്ളിയുടെ അതിശയഭംഗി നുകർന്നും കാനനക്കാഴ്ചകൾ പകർത്തിയും ഉള്ളം കുളിർത്തൊരു നടത്തം

- AZEEZ MAHE

വർണശബളമായ ഇലകൾ പൂക്കളെക്കാൾ ശോഭയോടെ ഇളം കാറ്റിലുലയുന്ന വനസൗന്ദര്യം. ഇലത്തണുപ്പുവീണ കാട്ടുവഴികൾ. പച്ചയുടെ ധാരാളിത്തത്തിലും ഇടയ്ക്കിടെ ചുവപ്പും മഞ്ഞയും വയലറ്റും നിറമണിഞ്ഞ ഇലക്കാഴ്ചയൊരുക്കി കാടുവിളിക്കുന്നു. ചോലവനക്കുളിരും ഈർപ്പം നിറഞ്ഞ മഴക്കാടുകളും ആസ്വദിച്ചെത്തുന്നത് വലിയ ജലപാതത്തിന്റെ കാൽച്ചുവട്ടിലേക്കാണ്. അതിരപ്പിള്ളി വെള്ളച്ചാട്ടം പശ്ചിമഘട്ടത്തിൽ നിന്ന് ഉരുവംകൊണ്ട അസംഖ്യം നീർച്ചാലുകൾ കൈവഴികളായി ഷോളയാർ താഴ്വരകളെ തലോടുന്നു. അത് മലക്കപ്പാറയും വാഴച്ചാലും പിന്നിട്ട് 330 അടിയോളം വിസ്തൃതമായ മടിത്തട്ടിൽ നിന്ന് എൺപതടി താഴ്ചയിലേക്ക് പതിക്കുന്നു. വന്യതയും പ്രകൃതി സൗന്ദര്യവും ഇഴചേരുന്ന അതിരപ്പിള്ളി വെള്ളച്ചാട്ടം പിന്നീട് നാലു കൈവഴികളായി ഒഴുകിപ്പരന്ന് ചാലക്കുടിപ്പുഴയായി മാറുന്നു. ഋതുഭേദങ്ങൾക്കനുസരിച്ച് ഈ ജലപാതത്തിന്റെ ഭാവചിത്രങ്ങൾ ഓർമ്മച്ചെപ്പിൽ തെളിമയോടുണ്ട്. ഉഷ്ണകാലത്ത് കളകളം പൊഴിച്ച് മെലിഞ്ഞ് മന്ദഗാമിയായി ഒഴുകിപ്പരക്കുന്ന തെളിനീർ പ്രവാഹമാണ്. വർഷകാലത്താകട്ടെ രൗദ്രഭാവം പൂണ്ട് ചെമ്മൺ നിറത്തിൽ കലങ്ങിമറിഞ്ഞാഴുകും. നിനച്ചിരിക്കാത്ത പ്രളയ മുഹൂർത്തങ്ങളിൽ സംഹാര രുദ്രയായാവും രൂപപ്പകർച്ച. "കേരളത്തിന്റെ നയാഗ്ര' എന്ന് വിളിപ്പേരുള്ള ഈ ജലപാതം, എപ്പോഴാണ് തന്റെ ഒഴുക്കിനെ തടസ്സപ്പെടുത്തി ഊർജം ഊറ്റാൻ അധികാരികളെത്തുന്നതെന്ന ഭയം ചൂടി നിൽക്കുകയാവും. അതിരപ്പിള്ളിയുടെ അതിജീവന കഥ പ്രകൃതിയെ നെഞ്ചേറ്റുന്ന ഒരുപറ്റം ദൃഢവതരായ മനുഷ്യരുടെ ഹാർപ്പണത്തിന്റെയും ചെറുത്തുനിൽപ്പിന്റെയും കഥകൂടിയാകുന്നു.