ഓണേശ്വരന്മാരുടെ ഗ്രാമം....

ഓണക്കാലത്ത് വടക്കേ മലബാറിലെ വീടുകളിലേയ്ക്ക് മഹാബലിയുടെ പ്രതിരൂപമായ ഓണപ്പൊട്ടൻ പടി കയറിയെത്തും. ഓണപ്പൊട്ടന്മാരുടെ ദേശമായ കോഴിക്കോട് ജില്ലയിലെ കുറ്റ്യാടിയ്ക്കടുത്തുള്ള നിട്ടൂരിലേയ്ക്ക്...

- P LIJEESH

ചിങ്ങത്തിലെ ഉത്രാടം നാൾ... നേരം പുലരുന്നതേയുള്ളൂ. നിട്ടൂരിന്റെ ആകാശത്ത് മഴക്കോളിന്റെ ഒരുക്കം കൂട്ടലുണ്ട്, നേരിയ മഴച്ചാറ്റലും. നിശ്ശബ്ദതയെ ഭേദിച്ച് കുത്തിയൊഴുകുന്ന, വെള്ളാലിപ്പിൽ തോടിന് കുറുകെയുള്ള ചെറിയ പാലം കടന്ന് കയറിച്ചെന്നത് വെള്ളാലിപ്പിൽ കേളപ്പപ്പണിക്കരുടെ വീട്ടിലേക്ക്. അവിടെ ഓണപ്പൊട്ടന്മാർ ദേശസഞ്ചാരത്തിനൊരുങ്ങുകയാണ്.

തൊട്ടപ്പുറത്തുള്ള രണ്ട് വീടുകളിലും ചായം തേച്ചും ചെമ്പട്ടു കൊണ്ടുള്ള ഉടയാടകെട്ടിയും ഒരുക്കം തകൃതി. പുലർച്ചെ മൂന്നുമണിക്ക് തുടങ്ങിയതാണ് ചമയം. അല്പസമയം കഴിഞ്ഞാൽ ഏഴുപേർ മഹാബലിയുടെ പ്രതിരൂപമായ ഓണപ്പൊട്ടനായി മാറി പ്രജകളെ കാണാനിറങ്ങും. ഇത് ഓണപ്പൊട്ടന്മാരുടെ ഗ്രാമം. കോഴിക്കോട് ജില്ലയിലെ കുറ്റ്യാടി നിട്ടൂർ ദേശം...

ചിങ്ങമാസത്തിലെ ഉത്രാടം, തിരുവോണം നാളുകളിൽ വടക്കേ മലബാറിലെ വീടുകൾ തോറും കയറി അനുഗ്രഹം ചൊരിയുന്നവരാണ് ഓണപ്പൊട്ടന്മാർ അഥവാ ഓണേശ്വരന്മാർ, മഹാബലിയുടെ വരവിനെ അനുസ്മരിപ്പിക്കുകയാണിവർ. മലയസമുദായക്കാർക്കാണ് ഈ വേഷം കെട്ടാനുള്ള അവകാശം. കോഴിക്കോട്, കണ്ണൂർ ജില്ലകളിലെ പല ഗ്രാമപ്രദേശങ്ങളിലും ഓണക്കാലത്ത് ഓണപ്പൊട്ടന്മാർ പതിവുതെറ്റിക്കാതെയെത്തും. പക്ഷേ, നിട്ടൂരിനെന്താണ് പ്രത്യേകതയെന്ന് ചോദിച്ചാൽ അത് കണ്ടുതന്നെ അറിയണം...

ഒരുമിച്ചിറങ്ങി...ഒന്നായ് നടന്ന്...

സമയം ആറുമണി. ചമയങ്ങളെല്ലാം പൂർത്തിയായി. കൂട്ടത്തിൽ മൂത്ത കേളപ്പപ്പണിക്കർ വാഴനാര് ഉണക്കി ചീകിയൊരുക്കിയ താടിയുമെടുത്ത് മുറ്റത്തേക്കിറങ്ങി, പിന്നാലെ മകൻ രാജേഷ് പണിക്കരും. കേളപ്പ പണിക്കരുടെ കാൽതൊട്ടുവന്ദിച്ച് നിവർന്നുനിന്ന രാജേഷിന്റെ മൂക്കിനു താഴെ താടിരൂപം കെട്ടി. ഇത് കെട്ടിയാൽ പിന്നെ ഓണപ്പൊട്ടൻ മിണ്ടില്ല. പിന്നാലെ മകളുടെ മകൻ ലാലുപ്പണിക്കർക്കും താടിവെച്ചു.