ദേവഗണങ്ങളുടെ കോട്ടയിൽ

 ഹിമാചലിലെ ബാസ്പ താഴ്വരയിലൂടെ കരു കോട്ടയിലേക്ക് നീളുന്ന സാഹസികയാത്ര. ഗ്രാമത്തെയും താഴ്വരയെയും സംരക്ഷിക്കുന്നത് കോട്ടയിലെ ദേവഗണങ്ങളത്രേ!

- EMIL JOY

ബനാക് ജുതേച്ച്, സമ്മാനിച്ച അരപ്പട്ടയും ക്രമുത്തൊപ്പിയും ധരിച്ചാണ് കരിങ്കൽക്കെട്ടിന്റെ മധ്യേയുള്ള വാതിൽ തുറന്നത്. ആദ്യമായാണ് ഇത്രയും രാജകീയമായൊരു കോട്ടകൊത്തളത്തിൽ പ്രവേശിക്കുന്നത്. തടികൾ കൊണ്ട് നിർമിച്ച് അഞ്ചുനിലകളുള്ള ക്രമു കോട്ട ആകാശത്തേക്ക് പണിതുയർത്തിയ ഗോപുരം പോലെ കാണപ്പെട്ടു.

നൂറ്റാണ്ടുകളുടെ പഴക്കം കോട്ടയെ ഇരുണ്ട നിറമാക്കിയിരിക്കുന്നു. ബാസ്പാ താഴ്വര ഒന്നാകെ ഭയഭക്തിയോടെ കാണുന്ന മുപ്പത്തിയാറു കോടി ദേവഗണങ്ങളെ കുടിയിരുത്തിയിരിക്കുന്നതും ഇതിലെ നിലകളിലൊന്നിലാണ്. കോട്ടയുടെ മുറ്റത്ത് പഗോഡയുടെ മാതൃകയിലുള്ള മന്ദിറുകൾ കാണാം. ഗുവാഹാട്ടിയിൽ നിന്ന് നൂറ്റാണ്ടുകൾക്കു മുൻപേ എത്തിച്ച കാമാഖ്യാദേവിയുടെ പ്രതിഷ്ഠയും ഇവിടെയുണ്ട്. കോട്ടയുടെ പിന്നിൽനിന്ന് അടുത്ത മലഞ്ചെരിവ് ആരംഭിക്കുകയാണ്. കടും നീ ല ആകാശത്തിനുകീഴെ മഞ്ഞണിഞ്ഞ പർവതമുനമ്പുകൾ വെയിലേറ്റ് സ്വർണവർണമാർന്നിരുന്നു.

ചണ്ഡീഗഢിൽ നിന്ന് വൈകീട്ട് ഏഴിന് ഹിമാചലിലെ റെക്കങ്പിയോയിലേക്ക് പുറപ്പെടുന്ന ഒരേയൊരു ബസ് കണക്കാക്കിയായിരുന്നു ഡൽഹിയിൽ നിന്ന് പുറപ്പെട്ടത്. നിർഭാഗ്യമെന്നു പറയട്ടെ, ട്രെയിൻ വൈകിയെത്തിയതിനാൽ ബസ് കിട്ടിയില്ല. അവിടെ എന്നെ കാത്തിരുന്ന സുഹൃത്ത് ഗുരുദേവിന് ഒറ്റയ്ക്ക് പുറപ്പെടേണ്ടി വന്നു. ഞാൻ ടാക്സിയിൽ ഷിംലയിലേക്ക് പുറപ്പെട്ടു. അയഞ്ഞ നീളൻ കുർത്തയും കടുംനിറത്തിലുള്ള തലപ്പാവും ധരിച്ച സർദാറായിരുന്നു ടാക്സി ഡ്രൈവർ, ഷിംലയെത്തുന്നതിനുമുൻപേ എന്നെ ബസ്സിനടുത്തെത്തിച്ചിരിക്കുമെന്ന് സർദാർ ഉറപ്പുനൽകി. എന്നാൽ, മലമ്പാതയിലെ ഗതാഗതക്കുരുക്ക് കണ്ടപ്പോൾ തന്നെ ആത്മവിശ്വാസം നഷ്ടപ്പെട്ടു. പക്ഷേ, ഓരോ കുരുക്കിൽ നിന്നും വിദഗ്ധമായി സർദാർ പുറത്തുചാടി.

ഒടുക്കം ഷിംലയ്ക്കുമുൻപേയുള്ള ധരംപുരിൽ വെച്ച് കാർ ബസ്സിനെ ഓവർടേക്ക് ചെയ്തു. ബസ്സിൽ സൂചികത്താനിടയില്ലാത്തവിധം തിരക്കായിരുന്നു. ഡ്രൈവറുടെ പിന്നിലായുള്ള സീറ്റായിരുന്നു റിസർവു ചെയ്തിരുന്നത്. ഡ്രൈവർ പരംജിത്തിനെയും കണ്ടക്ടറെയും കണ്ടു. റിസർവുചെയ്ത  സീറ്റിൽ ഒരു പെൺകുട്ടി ഇരിക്കുന്നു. ഇനിയെന്തുചെയ്യും! പരംജി പെൺകുട്ടിയെ പരിചയപ്പെടുത്തി

 “എന്റെ മരുമകളാകാൻ പോകുന്ന പെൺകുട്ടിയാണ്, ഒന്ന് അഡ്ജസ്റ്റു ചെയ്ത് ഇരിക്കുന്നതിൽ ബുദ്ധിമുട്ടില്ലല്ലോ...