കായൽസുന്ദരി കടമക്കുടി

പ്രകൃതിയുടെ സമസ്തസൗന്ദര്യവും വാരിപ്പുതയ്ക്കുകയാണ് കടമക്കുടി. ഋതുക്കൾക്കനുസരിച്ച് പൊക്കാളിയും ചെമ്മീനും വിളയുന്ന കടമക്കുടിയുടെ കായൽമാറിലൂടെ പോയിവരാം

- Text & Illustrations: SREELAL A G

കാൽ നൂറ്റാണ്ടിലേറെയായി കൊച്ചിയിൽ താമസിക്കുന്ന കണ്ണൂരുകാരനായ വിനയചന്ദ്രനൊപ്പമാണ് പുലർച്ചെ തന്നെ കടമക്കുടിയിലേക്ക് പുറപ്പെട്ടത്. മെയിൻ റോഡിൽ നിന്ന് കടമക്കുടിയിലേക്ക് ഗൂഗിൾ പറഞ്ഞുതന്ന വഴിയകലങ്ങളെല്ലാം തന്നെ വഴിയരികിൽ കണ്ട സൈൻ ബോർഡുകളിലെ ദൂരവുമായി ഒരുതരത്തിലും കൂട്ടി മുട്ടിയിരുന്നില്ല. അക്കാരണം കൊണ്ടുതന്നെ സൈൻബോർഡുകളെയും സ്ട്രീറ്റ്ലൈറ്റുകൾക്കു താഴെയുള്ള കുഞ്ഞുടീസ്റ്റാളുകളിൽ നിന്നും കട്ടൻ കുടിച്ച് വർത്തമാനം പറഞ്ഞുനിൽക്കുന്ന ആളുകളെയും ആശ്രയിച്ചാണ് യാത്ര തുടർന്നത്. വീതി കുറഞ്ഞ് വളഞ്ഞുപുളഞ്ഞ വഴികളിലൂടെ അവസാനം എത്തിയത് കൊച്ചി നഗരം ഉള്ളിലൊളിച്ചുവച്ച മനോഹര കാഴ്ചകളിലേക്കാണ്.

ചിത്രം പോലെ

കടമക്കുടിയിലേക്ക് കടക്കുമ്പോൾ അതുവരെ കണ്ട നഗരക്കാഴ്ചകളിൽ നിന്നും വ്യത്യസ്തമായ ദൃശ്യങ്ങളിലേക്കാണ് പ്രകൃതി നിങ്ങളെ എടുത്തെറിയുക. റോഡിനിരുവശവും പ്രശാന്തമായ ജലപ്പരപ്പുകളാണ്. അതിൽ അങ്ങിങ്ങായി ചേറിൽ നിന്നും കുത്തിപ്പൊക്കിയുണ്ടാക്കിയ ബണ്ടുകൾ... ബണ്ടുകളിൽ നിരനിരയായി നിൽക്കുന്ന തെങ്ങുകൾ, വെള്ളത്തിൽ അവയുടെ നീണ്ട നിഴലുകൾ, മീൻ പിടിക്കാൻ കെട്ടിയുണ്ടാക്കിയ ചീനവലകൾ, പുഴയിലൂടെ പോവുന്ന യന്ത്ര ത്തുഴ ഘടിപ്പിച്ച തോണികൾ...ആകെക്കൂടി കടമക്കുടിക്ക് ഒരു പ്രത്യേക അഴകാണ്.