കായലിലെ കൊച്ചുതുരുത്ത്

പകൽ മുഴുവൻ എരിഞ്ഞുകത്തുന്ന സൂര്യൻ, ചക്രവാളത്തിലേക്ക് മടങ്ങുന്ന കാഴ്ച. അതേറ്റവും മനോഹരമായി കാണാൻ കഴിയുന്നത് ആലപ്പുഴ ജില്ലയിലെ കാക്കത്തുരുത്തിലാണ്

- REESHMA DAMODAR

ആലപ്പുഴയിലെ എരമല്ലൂരിൽ നിന്ന് ഇടത്തോട്ടു തിരിഞ്ഞാൽ എത്തുന്നത് ഒരു ചെറിയ കടവിലാണ്. കടവെന്നു പറഞ്ഞാൽ ഷീറ്റ് മേഞ്ഞ ചെറിയൊരു ഷെഡ്. അക്കരയ്ക്കു പോവാനായി തയ്യാറായി നിൽക്കുന്ന ചെറുവള്ളം. ആളുകളെ കണ്ടപ്പോൾ തോണിക്കാരൻ തുഴകൊണ്ട് കുത്തി, വള്ളം കരയിലേക്കടുപ്പിച്ചു. “എങ്ങോട്ടാ?” കാക്കത്തുരുത്തെന്ന് പറഞ്ഞപ്പോൾ അയാൾ ആഞ്ഞുതുഴഞ്ഞു. കടവിലിറക്കി, കടത്തുകൂലിയും വാങ്ങി തിരിച്ചുപോയി. ഒരാൾക്ക് പത്തു രൂപയാണ് കടത്തുകൂലി.

മുന്നിൽ നീണ്ടു നിവർന്നുകിടക്കുന്ന മണ്ണിട്ട ഒറ്റയടിപ്പാത. ഇവിടത്തെ ശുദ്ധ വായു ശ്വസിക്കുമ്പോൾ ഭൂമിയുടെ ഏതോ അറ്റത്തെത്തിയപോലെ. വാഹനത്തിന്റെ ചക്രങ്ങൾ പോലും പോറലേൽപ്പിക്കാത്ത മണ്ണാണ് ഇവിടത്തേത്. ചെടികളിൽനിന്ന് ചെറിയ തുമ്പികൾ പറന്നുപൊങ്ങി. പലനിറത്തിലുള്ള പൂമ്പാറ്റകൾ പൂന്തേനിന്റെ സ്വാദിൽ പറ്റിച്ചേർന്നിരിക്കുന്നു. കുരുവികൾ രാവിലത്തെ കുശലം പറച്ചിലുകളിൽ മുഴുകിയങ്ങനെ...ഇടയ്ക്ക് ചെറിയ മരപ്പാലങ്ങളുമുണ്ട്. പൊട്ടിയ മരക്കഷണങ്ങൾ കോർത്തുകെട്ടിയ പാലങ്ങളിലൂടെ ശ്രദ്ധിച്ചുവേണം അപ്പുറത്തേക്കു പോവാൻ. കാലൊന്ന് തെന്നിയാൽപ്പിന്നെ വെള്ളത്തിൽ നോക്കിയാൽ മതി.

പാതയ്ക്കിരുവശവും ചെറിയ വീടുകളുണ്ട്. ഒന്നിനും മതിലുകളില്ല. പകരം ചെടികൾ തീർത്ത വേലികൾ മാത്രം. അതിരുകളില്ലാത്ത ഇടം. ഉച്ചയോടടുക്കുന്നു സമയം. വീടുകളിലൊന്നും ആളനക്കങ്ങളില്ല. വഴിയരികിലൊരു ചെറിയ അമ്പലം കാണാം. വടക്കിനേഴത്ത് ഭഗവതിക്ഷേത്രമാണിത്. കുറച്ചുകൂടി മുന്നോട്ടുപോയാൽ മറ്റൊരു ക്ഷേത്രവുമുണ്ട്, പ്ലാക്കിരിൽ ക്ഷേത്രം.