കഥപറയുന്ന മഹാസമാധികൾ

കല്ലറകളിലും മുനിയറകളിലുമുള്ളത് പോയകാലത്തിന്റെ ജീവിത സാംസ്കാരിക സ്പന്ദനങ്ങളാണ്. മഹാശിലായുഗത്തിന്റെ അവശേഷിപ്പുകൾ പേറുന്ന ആ സ്മൃതിപഥങ്ങളിലൂടെ

- JAYASREE V

കേരളത്തിൽ ആദിമശിലായുഗസംസ്കാരത്തനിമകൾ ഇന്നും കണ്ടെത്താൻ കഴിയുന്ന ഇടമാണ് എടയ്ക്കൽ ഗുഹ. പക്ഷേ, ലോഹയുഗവും കഴിഞ്ഞ് മഹാശിലായുഗത്തിലെത്തുമ്പോൾ തൃശ്ശൂർ ജില്ലയിൽപ്പെട്ട കുന്നംകുളം, ചൂണ്ടൽ ഭാഗങ്ങളിലാണ് കൂടുതൽ ചരിത്രാവശിഷ്ടങ്ങൾ ഉത്ഖനനം ചെയ്തെടുത്തിട്ടുള്ളത്. ഒമ്പത് സമാധി സ്ഥലങ്ങൾ ആർക്കിയോളജിക്കൽ സർവേ ഓഫ് ഇന്ത്യ (എ.എസ്.ഐ. സംരക്ഷിക്കുന്നുണ്ട്.

ഒരു വണ്ടിയും അത്യാവശ്യം സ്ഥലവിവരവുമുണ്ടെങ്കിൽ മഹാശിലാ യുഗം വരെ പോയി വരാൻ ഒരുദിവസം മതിയെന്നുള്ളത് പ്രലോഭനമായിരുന്നു. ക്യാമറയും കുപ്പിവെള്ളവുമായി വെളുപ്പിനേ പുറപ്പെട്ടു. ആദ്യലക്ഷ്യം എയ്യാൽ തന്നെയാകട്ടെ.

വെട്ടുകൽ ഗുഹയാണ് എയ്യാലിലെത്. കേരളത്തിൽ മാത്രം കണ്ടത്തിയിട്ടുള്ള ഒരു ശവസംസ്കാര രീതിയാണ് വെട്ടുകൽ ഗുഹകൾ. ശിലയ്ക്കു മുകളിൽ വലിയൊരു ദ്വാരമുണ്ടാക്കുന്നു. ഈ ദ്വാരത്തിന്റെ ഒരു ഭാഗത്തു നിന്ന് കല്ലുവെട്ടിമാറ്റിക്കൊണ്ട് ഗുഹയിലേക്കു  പ്രവേശിക്കുന്നു. പിന്നീട് പ്രവേശനദ്വാരത്തിൽ കൂടി കല്ലുവെട്ടിമാറ്റിക്കൊണ്ട് ഗുഹയുടെ ഉൾവശം നിർമിക്കുന്നു. പ്രവേശന ദ്വാരത്തിന് ഏകദേശം അരമീറ്റർ നീളവും വീതിയുമേ കാണുകയുള്ളൂ. അതിനുള്ളിലെ ഗുഹ സാമാന്യേന വലുതായിരിക്കും. ഗുഹയ്ക്കുള്ളിൽ കല്ലുകൊണ്ടു നിർമിച്ച ശയനശില (Stone bed) കാണാം. മൺപാത്രങ്ങൾ, ആയുധങ്ങൾ, മൃഗാവശിഷ്ടങ്ങൾ, നാണയങ്ങൾ എന്നിവയെല്ലാം ഗുഹയ്ക്കുള്ളിൽ നിന്ന് കണ്ടെടുത്തിട്ടുണ്ട്.

കുന്നംകുളമെത്തുന്നതിനു മുൻപുതന്നെ കേച്ചേരിയിൽ നിന്ന് അക്കിക്കാവ് വഴിയിലേക്കു തിരിഞ്ഞു. കുറച്ചുദൂരം സഞ്ചരിച്ചപ്പോൾ റോഡ്, പച്ചപ്പിന്റെ കമാനങ്ങൾക്കുള്ളിലൂടെ യായി. ഒടുവിൽ കമ്പിവേലികൊണ്ട് വളച്ചുകെട്ടിയ, കാവിന്റെ പ്രതീതിയുള്ള ചരിത്രസ്മാരകത്തിന്റെ അരികിലെത്തി.

എയ്യാലിലെ വെട്ടുകൽ ഗുഹ വലുതും ചെറുതുമായ രണ്ടറകളോടു കൂടിയതാണ്. പ്രധാന അറയിലേക്കു നീളുന്ന ഒരിടനാഴിയുണ്ട്. ഒരറയുടെ മുകൾഭാഗം മുഴുവനായി തകർന്ന രീതിയിലാണ്. വലിയ അറയുടെ മൂന്നു ഭാഗത്തും ശയനശിലകളും മുകൾഭിത്തിയെ താങ്ങിനിർത്തുന്ന തൂണും കാണാം.