കാവടിയാടും ഗ്രാമം

മന്നം ഗ്രാമത്തിൽ നിർമിക്കുന്ന ഓരോ കാവടിക്കുമുണ്ട് കഥകൾ പറയാൻ. കാവടിക്കുള്ള പൂനിർമാണം മുതൽ കാവടിയാടുന്നതുവരെയുള്ള ഘട്ടങ്ങൾ ഇവിടെയുള്ളവർക്ക് ജീവശ്വാസംകൂടിയാണ്.

പല വലുപ്പത്തിലും തരത്തിലുമുള്ള വർണപ്പൂക്കളും മയിൽപ്പീലികളും കൊണ്ടലങ്കരിച്ച മനോഹരമായ കാവടികളേന്തി അവർ നിരത്തിലിറങ്ങി. ചെണ്ടയുടെയും തകിലിന്റെയും ശിങ്കാരിമേ ളത്തിന്റെയും താളത്തിനൊപ്പം കാവടികൾ ആടിത്തുടങ്ങി. മനസ്സും ശരീരവും ഒരേ താ ളത്തിൽ തുടിക്കുന്നു. വഴിയരികിൽ നിന്നവർ ഒരുമിച്ചു പാടുകയായി, “ഹരോ ഹര ഹരോ ഹര... ആടിത്തിമർത്തശേഷം കാവടികളെല്ലാം ക്ഷേത്രാങ്കണത്തിലേക്ക് നീങ്ങി. മറ്റൊരു തൈപ്പൂയ്യം കൂടി കൊടിയിറങ്ങി.

എന്നാൽ, നോർത്ത് പറവൂരിനടുത്തുള്ള മന്നം ഗ്രാമത്തിലെ കാവടികൾക്കും കാവടിയാട്ടക്കാർക്കും തിരക്കൊഴിഞ്ഞിട്ടില്ല. ചെറിയൊരു വിശ്രമത്തിനുശേഷം അവിടെ കാവടിനിർമാണം വീണ്ടും ചൂടുപിടിക്കും. അവർ പുതിയ കാവടികൾ നിർമിക്കാനും അറ്റകുറ്റപ്പണികൾ നടത്താനും തുടങ്ങുകയായി.

മന്നം സുബ്രഹ്മണ്യക്ഷേത്രത്തിലെ തെപൂയ്യത്തിനുവേണ്ടിയാണ് ഇവിടെ പ്രധാനമാ യും കാവടികൾ തയ്യാറാക്കുന്നത്. എന്നാൽ, ആഘോഷം കഴിയുന്നതോടെ മറ്റിടങ്ങളിലെ ഉത്സവങ്ങൾക്കും കാവടികൾ ഉപയോഗിക്കും. ഈ ചെറുഗ്രാമത്തിൽ കാവടിയുമായി ബന്ധപ്പെട്ട് പ്രവർത്തിക്കുന്ന ആയിരക്കണക്കിനാളുകളെ കാണാം.

“ഒരുപ്രാവശ്യമെങ്കിലും, ഒരു ചെറിയ കാവടിയെങ്കിലും തോളിലേറ്റാൽ ആരും തന്നെ ഇവിടില്ലെന്നു പറയാം''-വിനായക കാവടിസംഘം ഉടമ സുനിൽകുമാർ പറഞ്ഞു.

സുനിൽകുമാര, കാവടിസംഘത്തിന്റെ പ്രവർത്തനം തുടങ്ങിയിട്ട് 39 വർഷമായി. “ക്ഷേത്രത്തിലെ തൈപ്പൂയ്യ ഉത്സവത്തിനുവേണ്ടി മാത്രമാണ് മുമ്പ് കാവടിയുണ്ടാക്കിയിരുന്നത്. തൈപ്പൂയ്യം കഴിയുമ്പോൾ ആവശ്യവും കഴിയും. അങ്ങനെ 86-ലാണ് വേൽമുരുക കാവടി സംഘത്തിന് രൂപം നൽകുന്നത്. ഉത്സവത്തിനൊപ്പം വേറേയും പരിപാടികൾ കിട്ടിത്തുടങ്ങി. 2006-ലാണ് വിനായക എന്നപേരിൽ ഗ്രൂപ്പ് തുടങ്ങുന്നത്''-സുനിൽകുമാർ മന്നംകാവടിയുടെ പഴയകാലത്തിലേക്ക് തിരിച്ചുപോയി.

“ഹൈന്ദവ എന്ന കാവടിസംഘമാണ് ആദ്യമുണ്ടായിരുന്നത്. ഇന്നിപ്പോൾ സജീവമായി നിൽക്കുന്ന ഏഴ് സംഘങ്ങളുണ്ട്. സുബ്രഹ്മണ്യ കാവടിസംഘം, ശക്തി വേൽ കാവടിസംഘം, ഓം ശക്തി, ശ്രീകാർത്തികേയ, വടക്കുംനാഥൻ''-വേൽ മുരുക കാവടി സംഘത്തിന്റെ നടത്തിപ്പുകാരൻ കൂടിയായ പ്രശാന്ത് പറയുന്നു.