જો તમે પણ આત્મવિશ્વાસ જાગૃત કરીને સપનાને પાંખો લગાવવા ઈચ્છો છો તો જરા જાણી લો આ માને જેણે પોતાની મહેનતથી જમાનો ચરણોમાં લાવી દીધો..

મા જે બની મિશાલ

જુલાઈ ૨૦૧૯ ની વાત છે જ્યારે કોફી કેફે ડે (સીસીડી) જેવી મોટી કંપનીના માલિક વી. જી. સિદ્ધાર્થે બિઝનેસમાં નુકસાન અને દેવાના લીધે આત્મહત્યા કરી લીધી હતી. મીડિયામાં તેમની એક સુસાઈડ નોટ પણ મળી આવી હતી, જેમાં સિદ્ધાર્થ એક પ્રોફિટેબલ બિઝનેસ મોડલ બનાવવામાં મળેલી નિષ્ફળતા માટે માફી માંગી રહ્યા હતા. આ લેટરમાં લખ્યું હતું કે તેઓ પ્રાઈવેટ ઈક્વિટી હોલ્ડર અને અન્ય લેણદારના દબાણ અને ઈન્કમટેક્સ ડિપાર્ટમેન્ટની હેરાનગતિને સહન કરી શકે તેમ નહોતા, તેથી આત્મહત્યા કરી રહ્યા છે.

સિદ્ધાર્થના આ આકસ્મિક મોત પછી તેમના પત્ની માલવિકા ખૂબ હતાશ થઈ ગયા હતા. તેમની આનંદભરી દુનિયા વેરણછેરણ થઈ ગઈ હતી. એક તરફ પતિના મોતનો આઘાત બીજી તરફ કરોડોના દેવામાં ડૂબેલી કંપની. વધારામાં તેમને પોતાના બંને દીકરાના ભવિષ્યની ચિંતા હતી, પરંતુ આ ખરાબ પરિસ્થિતિમાં પણ માલવિકા હેગડે હિંમત ન હાર્યા અને પૂરા આત્મવિશ્વાસથી મોરચો સંભાળી લીધો. કંપનીની લગામ પોતાના હાથમાં લઈ લીધી અને લાગી ગયા બધું ઠીક કરવાના પ્રયાસમાં. પછી તેમની મહેનત પણ રંગ લાવી અને ૨ વર્ષમાં કંપની ફરીથી પોતાના પગ પર ઊભી થઈ ગઈ.

૩૧ માર્ચ, ૨૦૧૯ સુધીના આંકડા અનુસાર કેફે કોફી ડે પર લગભગ રૂપિયા ૭ હજાર કરોડનું દેવું હતું, ૨૦૨૦ માં માલવિકા હેગડે કેફે કોફી ડે એન્ટરપ્રાઈઝ લિમિટેડના સીઈઓ બન્યા. જે સમયે માલવિકાએ કંપનીની લગામ સંભાળી ત્યારે તેમની સામે ૪ પડકાર હતા. પતિ વીજી સિદ્ધાર્થના મોતના આઘાતમાંથી બહાર આવવું, પરિવારને સંભાળવો, કંપનીને દેવામાંથી બહાર કાઢવી અને કામ કરતા કર્મચારીઓના રોજગારને બચાવવો. વિપરીત પરિસ્થિતિ સામે લડતા ખૂબ ઓછા સમયમાં તેમણે સફળતા અને નારી શક્તિનું એક ઉત્તમ ઉદાહરણ સ્થાપિત કર્યું.

જે કહ્યું તે કરીને બતાવ્યું

એક રિપોર્ટ અનુસાર, માર્ચ ૨૦૨૧ સુધીમાં સીસીડી કંપની પર રૂપિયા ૧,૭૭૯ કરોડનું દેવું બાકી રહી ગયું હતું, જેમાં રૂપિયા ૧,૨૬૩ કરોડની લોંગ ટર્મ લોન અને રૂપિયા ૫,૧૬ કરોડનું શોર્ટ ટર્મ દેવું સામેલ હતું. હાલમાં સીસીડી ભારતના ૧૬૫ શહેરમાં ૫૭૨ કેફે સંચાલિત કરી રહ્યું છે. ૩૬,૩૨૬ વૅડિંગ મશીન સાથે સીસીડી દેશની સૌથી મોટી કોફી સર્વિસ બ્રાન્ડ છે. આ રીતે સ્થિતિમાં ખૂબ સુધારો આવ્યો અને તેનો શ્રેય જાય છે માલવિકાની કુશળ પ્રબંધન ક્ષમતાને અને કંપનીના હિતમાં કરવામાં આવેલા તેમના કાર્યોને.