சென்னையை உலகளவில் ஒரு முன்மாதிரி நகரமாக மாற்றுவோம்!

மாநகராட்சி கூட்டத்தில் நிலைக்குழு கணக்கு மற்றும் தணிக்கை குழு தலைவர் க.தனசேகரன் பேச்சு!!

சென்னை மாநகராட்சி கூட்டத்தில், நிலைக்குழு கணக்கு மற்றும் தணிக்கை குழு தலைவர் க.தனசேகரன் பேசியதாவது:

வரலாற்றுச் சிறப்புமிக்க நமது பெருநகர சென்னை மாநகராட்சியின் 2025-2026 ஆம் ஆண்டுக்கான நிதிநிலை அறிக்கையை மிகச் சிறப்பாக தாக்கல் செய்யப்பட்டது. தமிழ்நாடு முதல் மைச்சர் மு.க.ஸ்டாலினின் சிறப்பான வழிகாட்டுதலிலும், துணை முதலமைச்சர் உதயநிதி ஸ்டாலினின் உந்துதலிலும் நமது மாநகராட்சி மக்களின் அடிப்படைத் தேவைகள் நிறைவேற்றும் வகையில் வளர்ச்சிப் பாதையில் முன்னேறி வருகிறது.

இந்த 2025-26 நிதிநிலை அறிக்கையில், நமது மொத்த வரவு ரூ.8,267.17 கோடியாகவும், செலவு ரூ.8,404.70 கோடியாகவும் மதிப்பிடப்பட்டுள்ளது. தற்போது வருவாய் குறைபாடு கடந்த ஆண்டை விட பெரும் அளவில் குறைக்கப்பட்டுள்ளது. இதில் சிறப்பான அம்சம் என்னவென்றால், மாநகராட்சியின் வருவாய் தொடர்ந்து அதிகரித்து ரூ.3,186 கோடியை எட்டியுள்ளது குறிப்பிடத்தக்கதாக உள்ளது.

மேலும் குறிப்பாக, சொத்துவரி மூலம் ரூ.2020 கோடியும், தொழில்வரி மூலம் ரூ.600 கோடியும், மாநில மானியமாக நிதிக்குழு ரூ.1150 கோடியும் பெறப்படும்.

இவை சிறப்பான நிதி மேலாண்மையை எடுத்துக்காட்டுகிறது. நமது பெருநகர மக்களின் வாழ்க்கைத்தரத்தை மேம்படுத்தும் வகையில் இந்த 2025-26 நிதியாண்டில் சிறப்புத் திட்டங்களாக:

• பேருந்து சாலைகள் மேம்பாட்டுக்கு ரூ.628.35 கோடி.

• மழைநீர் வடிகால்வாய்கள் அமைப்பதற்கு ரூ.1032.25 கோடி.

• திடக்கழிவு மேலாண்மைக்கு ரூ.352 கோடி.

• கட்டட உட்கட்டமைப்பு மேம்பாட்டுக்கு ரூ.413.63 கோடி.

• சிறப்புத் திட்டங்களுக்கு ரூ.179.03 கோடி ஒதுக்கீடு செய்யப்பட்டிருப்பதை வரவேற்கிறேன்.