ആർജിക്കാം സോഫ്റ്റ് സ്കിൽ

പഠിച്ചുകൊണ്ടിരിക്കുന്ന സാങ്കേതികകാര്യങ്ങൾ പഠിച്ചുതീരുംമുമ്പേ ഔട്ട്ഡേറ്റഡ് ആകുന്ന കാലത്താണ് നമ്മൾ ജീവിക്കുന്നത്. സ്വയം പഠിച്ചും നിരന്തരം നവീകരിച്ചുമല്ലാതെ ഇനിയുള്ള കാലത്ത് അതിജീവിക്കാനാവില്ല...

- സുഹൈൽ ബാബു സി.ഇ.ഒ, ഹാപ്പിനെസ് റൂട്ട്

അവസരങ്ങളുടെ വലിയ ലോകം തന്നെയാണ് പുതിയ കാലം നമുക്കു മുന്നിൽ തുറക്കുന്നത്. തൊഴിലിന്റെ കാര്യത്തിൽ അതിരുകളെല്ലാം മായ്ച്ച് ലോകം നമ്മെ തേടി വരുന്ന അനുഭവമാണ് ഇന്നുള്ളത്. എന്നാൽ, എല്ലാവർക്കും ഒരുപോലെ അവസരങ്ങൾ ലഭിക്കുന്നുണ്ടോ? സർട്ടിഫിക്കറ്റും യോഗ്യതകളും ടെക്നിക്കൽ ശേഷികളും ഉണ്ടായതു കൊണ്ടുമാത്രം അവസരങ്ങളുടെ വാതിൽ നമുക്കു മുന്നിൽ തുറക്കുമോ? ഇല്ലെങ്കിൽ പിന്നെന്താണ് നമുക്ക് വേണ്ടത്.

ഓരോ കാലത്തും മനുഷ്യന് അതിജീവിക്കാൻ പലതരത്തിലുള്ള ക്ഷമതകൾ കൈവരിക്കേണ്ടി വന്നിട്ടുണ്ട്. വേട്ടയാടി ജീവിച്ചിരുന്ന കാലം തൊട്ട് വ്യവസായവത്കരണത്തിന്റെ തുടക്കം വരെയെങ്കിലും കായികക്ഷമതയും വഴക്കവുമുള്ളവർ മിടുക്കരായി കരുതപ്പെട്ടു പോന്നു. അതിനു ശേഷമുള്ള കാലത്ത് ശാരീരിക ശക്തിയെക്കാൾ വിദ്യാഭ്യാസം നേടാനായവർക്ക് വലിയ അന്തസ്സ് കൈവന്നു. ഒട്ടുമിക്ക തൊഴിൽ മേഖലകളിലും ബുദ്ധിപരമായ വ്യവഹാരശേഷികൾ ആവശ്യമായും വന്നു. പിന്നീടങ്ങോട്ട് സാങ്കേതികവിദ്യ വളർന്നപ്പോൾ മനുഷ്യൻ ചെയ്തിരുന്ന പല ജോലികളും യന്ത്രങ്ങൾ ചെയ്യാൻ തുടങ്ങി. അതിനിയും വളർന്നു കൊണ്ടിരിക്കും. അപ്പോൾ പിന്നെ മനുഷ്യനെ പാടെ ജോലിക്ക് ആവശ്യമില്ലാത്ത അവസ്ഥ വരുമോ?