മലമുകളിൽ ഒരു പേടിപ്പെടുത്തും രാത്രിയിൽ

ഒരു ഉല്ലാസ യാത്ര കാറിന്റെ തകരാറുകൊണ്ട് മുടങ്ങിയ അനുഭവം വിവരിക്കുന്നു ലേഖിക

- നഷീദ സലാം

മരംകോച്ചുന്ന രാത്രിയിൽ കൊടൈക്കനാൽ പതിയെ മയങ്ങി തുടങ്ങിയപ്പോഴാണ് ഞങ്ങൾ കാറിൽ ചുരം കയറി എത്തിയത്. സമയം ഒമ്പതു മണിയോടടുക്കുന്നു. പകൽക്കാഴ്ചകൾക്ക് വിരാമമിട്ട് സഞ്ചാരികളുടെ വണ്ടികൾ ചുരമിറങ്ങുന്ന തിരക്ക്. ഒന്നുരണ്ട് ഓർഡിനറി ബസുകൾ മാത്രമാണ് മുകളിലേക്കു പോകുന്നത്.

ടൂറിസ്റ്റ് ബസുകൾ എതിരെ വരുമ്പോൾ ഞങ്ങളുടെ കാർ മുന്നിലെ ബസിനു പിന്നിൽ പതുങ്ങും. 40 കിലോമീറ്ററോളം കയറിയപ്പോഴാണ് റോഡരികുകളിൽനിന്ന് പലരും വിളിച്ചുപറയുന്നത് കേട്ടത് വണ്ടി സൈഡ് ആക്കൂ. നിങ്ങളുടെ വണ്ടി കത്തുകയാണ്. അപ്പോഴേക്കും ഞങ്ങളുടെ കാർ ഓഫായി. അതിന്റെ മുൻഭാഗത്തുനിന്ന് പുക ഉയരുന്നുണ്ട്.