ചക്കയോളം വില

ചക്കക്ക് വമ്പൻ വിലയാണ് എറണാകുളം ജില്ലയിലെ കിഴക്കൻ മേഖലയിൽ. ഇടിച്ചക്ക പരുവത്തിൽ എത്തും മുമ്പെ ഇവിടത്തെ പ്ലാവുകൾക്ക് വിലയുറപ്പിക്കും കച്ചവടക്കാർ...

- കെ.പി. റസാഖ്

ചക്കക്കൂട്ടാൻ കണ്ട കിടാങ്ങളെപ്പോലെ' എന്ന ചൊല്ല് ഇപ്പോൾ ചക്കക്കൂട്ടം കണ്ട കച്ചോടക്കാരെപ്പോലെ' എന്ന് തിരുത്തിപ്പറയുകയാണ് എറണാകുളം ജില്ലക്കാർ. ഇവിടെ കിഴക്കൻ മേഖലയിലെ പ്ലാവുകളിലെ ചക്കയെല്ലാം മൂപ്പെത്തും മുമ്പേ കച്ചവടമായിക്കഴിഞ്ഞു. ലക്ഷക്കണക്കിന് രൂപയുടെ ചക്കക്കച്ചവടമാണ് കാലടി, പെരുമ്പാവൂർ, ഓടക്കാലി എന്നിവിടങ്ങളിലെ കയറ്റുമതി കേന്ദ്രങ്ങളിൽ നടക്കുന്നത്.

ഡിമാൻഡ് ഇടിച്ചക്കക്ക്

സംസ്ഥാന ഫലമായ ചക്കക്ക് നല്ല കാലമാണ് ഇപ്പോൾ. അധികം മൂപ്പെത്താത്ത ഇടി ചക്കക്കാണ് ഡിമാൻഡ് കൂടിയത്. ഇടിച്ചക്ക കൊണ്ടുണ്ടാക്കുന്ന ബേബി ഫുഡ്, പൊടി എന്നിവക്ക് രാജ്യത്തിന് അകത്തും പുറത്തും ഡിമാൻഡ് വർധിച്ചതോടെ പ്ലാവിൽ ചക്ക തിരിയിട്ട് തുടങ്ങുമ്പോഴേ കച്ചവടക്കാർ ഗ്രാമങ്ങളിലടക്കം ഇവ അടങ്കൽ എടുക്കുകയാണ്. ഒരു പ്ലാവിൽ ഉണ്ടാകുന്ന ചക്കയുടെ എണ്ണമെടുത്ത് അഡ്വാൻസ് നൽകി കരാർ ഉറപ്പിച്ചശേഷം ഇടിച്ചക്കയാകുമ്പോൾ എത്തി പറിച്ചുകൊണ്ടുപോകും.

ഇടിച്ചക്ക കച്ചവടം ഇവിടത്തെ ഗ്രാമപ്രദേശങ്ങളിൽ പൊടിപൊടിക്കുന്നു. പലയിടങ്ങളിലും ചക്കയുടെ എണ്ണത്തിനാണ് വില. ഒന്നിന് 25 മുതൽ 35 രൂപ വരെ വിലക്ക് കുടികളിൽ നിന്നും കച്ചവടക്കാർ വാങ്ങുന്നു. വലുപ്പമുള്ളവക്ക് കൂടുതൽ ഡിമാൻഡുണ്ട്. ഇതിന് 50 രൂപ വരെ നൽകുന്നുണ്ട്. കച്ചവടക്കാർ വിൽക്കുമ്പോൾ ചക്ക കിലോക്ക് അനുസരിച്ചാണ് വില ലഭിക്കുന്നതെന്നതാണ് ഇതിന് കാരണം. ചക്കക്കുരുവിനും വിപണിയിൽ വലിയ സ്വീകാര്യതയാണ്. കിലോഗ്രാമിന് 60 മുതൽ 110 രൂപ വരെയാണ് നിലവിലെ വില.