Ride with RaGa

ഹിമാലയത്തിലെ ദുർഘടം പിടിച്ച വഴികളിലൂടെ ആയിരത്തിലധികം കിലോമീറ്റർ രാഹുൽ ഗാന്ധിയുടെ കൂടെ ബൈക്കിൽ സഞ്ചരിച്ച കോഴിക്കോട് സ്വദേശി മുർഷിദ് തന്റെ അനുഭവങ്ങൾ പങ്കുവെക്കുന്നു.

- വി.കെ. ഷമീം

2023 ആഗസ്റ്റ് 19. ഹിമാലയൻ പർവതങ്ങൾക്കിടയിലെ ലേ നഗരം, അവിടെ ആറു ബൈക്കുകളിലായി ആറുപേർ സാഹസിക യാത്രക്ക് ഒരുങ്ങിനിൽക്കുകയാണ്. ഇനിയുള്ള ഒമ്പതു ദിവസം ലഡാക്കിലെ അതി കഠിനമായ വഴികളിലൂടെയും ജമ്മു-കശ്മീരിലെ നയനസുന്ദരമായ താഴ്വാരങ്ങളിലൂടെയുമാണ് യാത്ര. ഈ യാത്രക്ക് പതിവ് ലഡാക്ക് റൈഡിൽനിന്ന് അൽപം വ്യത്യാസമുണ്ട്. ഇരുപതിലധികം സുരക്ഷ വാഹനങ്ങൾ ഇവർക്ക് അകമ്പടിയേകുന്നുണ്ട്. കാരണം, അതിലുള്ള ഒരാൾ ഇന്ത്യൻ രാഷ്ട്രീയത്തിലെ സമുന്നത നേതാവാണ്, രാഹുൽ ഗാന്ധി.

തികച്ചും വ്യത്യസ്തമായ ഈ യാത്രയിൽ ഒരു മലയാളി ഡ്രൈവറുമുണ്ട്. കോഴിക്കോട് സ്വദേശിയും അഡ്വഞ്ചർ മോട്ടോർ സൈക്ലിസ്റ്റുമായ മുർഷിദ് ബഷീർ. ആറുപേരും കൂടി പിന്നീട് സഞ്ചരിച്ചത് ആയിരത്തിലധികം കിലോമീറ്റർ വ്യത്യസ്ത നാടുകളും നാട്ടുകാരെയും കണ്ട് ആ യാത്ര മുന്നേറി. ഒടുവിൽ ശ്രീനഗറിൽ നിന്ന് പലവഴിക്ക് മടങ്ങിയപ്പോഴും ഒരിക്കലും പിരിയാനാവാത്ത ആത്മ ബന്ധം അവർക്കിടയിൽ തുന്നിച്ചേർത്തിരുന്നു.

ലഡാക്കെന്ന സ്വപ്നഭൂമി

ഏതൊരു സഞ്ചാരിയുടെയും ഡ്രീം ഡെസ്റ്റിനേഷനാണ് ലഡാക്ക്, പ്രത്യേകിച്ച് ബൈക്ക് റൈഡർമാരുടെ. അത്യന്തം അപകടം നിറഞ്ഞ വഴികളും സാഹചര്യങ്ങളുമാണ് ഇവിടത്തേത്. മഞ്ഞുരുകി വെള്ളമായി ഒഴുകുന്ന വഴികൾ, ശരീരത്തിലേക്ക തുളച്ചുകയറുന്ന തണുപ്പ്, ഓക്സിജന്റെ കുറവ് കാരണം ശ്വസിക്കാൻ പോലും ബുദ്ധിമുട്ടേറിയ കാലാവസ്ഥ. ഇങ്ങനെ നിരവധി പ്രതിബന്ധങ്ങളുണ്ട്. അവയെയെല്ലാം മറികടന്ന് യാത്ര പോകുന്നതിലെ ത്രില്ല് ആസ്വദിക്കാൻ തന്നെയാണ് ഓരോ വർഷവും ലഡാക്കിലേക്ക് ബൈക്കുമായി ആയിരങ്ങൾ എത്തുന്നത്.

കന്യാകുമാരിയിൽനിന്ന് ശ്രീനഗർ വരെയുള്ള ഭാരത് ജോഡോ യാത്രക്കു ശേഷമാണ് രാഹുൽ ഗാന്ധി ഇത്തരമൊരു സാഹസിക യാത്രക്ക് മുതിരുന്നത്. കൂടെ വരാനായി ബൈക്ക് റൈഡിങ്ങിൽ അടങ്ങാത്ത പാഷനും ഈ മേഖലയിൽ വിദഗ്ധരും സംരംഭകരുമായ ആളുകളെയാണ് തിരഞ്ഞെടുത്തത്. അങ്ങനെയാണ് ഡൽഹിയിൽനിന്ന് മുർഷിദിന് ക്ഷണം ലഭിക്കുന്നതും യാത്രയുടെ ഭാഗമാകുന്നതും.

വഴിമുടക്കിയ പ്രകൃതിക്ഷോഭം

യാത്രാസംഘം ആഗസ്റ്റ് 17ന് വിമാനം കയറി ലേയിലെത്തി. തുടർന്ന് അവിടത്തെ കാലാവസ്ഥയുമായി പൊരുത്തപ്പെടാൻ രണ്ടുദിവസം വിശ്രമം. സമുദ്രനിരപ്പിൽനിന്ന് 11,000 അടിയിലേറെ ഉയരമുള്ള സ്ഥലമായതിനാൽ ഓക്സിജന്റെ അളവ് ഇവിടെ കുറവാണ്.