ഒന്നായിട്ടും രണ്ടാവാതിരിക്കാൻ

വൈവാഹിക ബന്ധം ഊഷ്മളവും ഫലപ്രദവുമായി മുന്നോട്ടു കൊണ്ടുപോകാൻ ഇക്കാര്യങ്ങൾ ജീവിതത്തിൽ പാലിക്കാം...

- ഹബീബ ഹുസൈൻ ടി.കെ Clinical Psychologist. HOPE CAPS, Aluva

പരാതികളുടെയും പരിഭവങ്ങളുടെയും നീണ്ട നിരയിലൂടെയായിരിക്കും ഓരോ ദിവസവും കൺസൾട്ടേഷൻ നിർത്തുക.

"ഇണയും തുണയും' -കേൾക്കാൻ ഇമ്പമുള്ളതാണെങ്കിലും അഭിപ്രായഭിന്നതകളുടെ, ഉൾക്കൊള്ളാൻ പറ്റാത്ത പ്രകൃതക്കാരുടെ മറ്റൊരു പേരായി മാറിയിരിക്കുന്നു ഇന്നത്. നിസ്സാരകാര്യങ്ങളുടെ മേൽ ജീവിതത്തിലെ സന്തോഷത്തിന്റെ നിറംകെടുത്തിയവർ നമുക്ക് ചുറ്റും ഒരുപാടുണ്ട്. സാമീപ്യം കൊണ്ട് സന്തോഷം കിട്ടുന്ന ഒന്നാണ് ഭാര്യാഭർതൃബന്ധം.

വിവാഹിതരായി അഞ്ചുവർഷം കഴിഞ്ഞ, സ്വകാര്യമേഖലയിൽ ജോലിചെയ്യുന്ന ദമ്പതിമാർ പരസ്പരം പഴിചാരി, മുന്നോട്ടുവെക്കാൻ ഒരു നന്മപോലും ബാക്കിവെക്കാതെ കഴിഞ്ഞ രണ്ടു മണിക്കൂറിലേറെയായി വാഗ്വാദത്തിലാണ്. സമയം പങ്കുവെക്കപ്പെടുന്നില്ല, കൂടിയാലോചനയോ വ്യക്തി സ്വാതന്ത്ര്യമോ ഇല്ല എന്നതാണ് പരാതി. ഒരു ഞാണിന്മേൽ കളി പോലെ മുന്നോട്ടുപോകുന്ന ജീവിതം. ശാരീരികവും വൈകാരികവും സംസാരത്തിലൂടെയുമുള്ള സംഘർഷങ്ങൾ ദമ്പതിമാർക്കിടയിൽ പുതുമയല്ലാതായിരിക്കുന്നു. പടവെട്ടി ജയിക്കുന്ന അങ്കത്തളമായി മാറിയിരിക്കുന്നു വീടെന്ന ഇടം.

24കാരിയായ സന ഒരു മൾട്ടിനാഷനൽ കമ്പനിയിൽ സീനിയർ ഓഫിസറാണ്. കൂടെയുള്ള സുഹൃത്ത് സാബുവുമായി മൂന്നു മാസംമുമ്പ് വീട്ടുകാരുടെ ആശീർവാദത്തോടെ ഒന്നിച്ചതാണ്. ഇന്നിപ്പോൾ യോജിച്ചു പോകാവുന്ന ഒരിടം പോലുമില്ലെന്ന് പറഞ്ഞാണ് സെഷ ന് വന്നത്. പരസ്പരം ഭാരമായി മുന്നോട്ടുപോകുന്നില്ല. മൂന്നു മാസത്തെ ഒരുമിച്ചുള്ള താമസത്തിനൊടുവിൽ പരസ്പര സമ്മതത്തോടെ സ്വതന്ത്രമാവണമെന്ന ആഗ്രഹമാണ് ഇരുവർക്കും.