വലിച്ചുകേറി വാ..

കൈയൂക്കും തിണ്ണമിടുക്കും മാത്രമല്ല, പതിയെ കയറിപ്പിടിക്കുന്ന ചുവടുകളും ആവേശത്തിര തീർക്കുന്ന അനൗൺസ്മെന്റും ഒന്നിച്ചുണരുന്ന വടംവലിയുടെ ഇത്തിരി ചരിത്രവും വർത്തമാനവും...

- കെ.പി. മൻസൂർ അലി

ആഘോഷം നാടൊന്നിച്ചെങ്കിൽ, ഒരു ഭീമൻ കയറിന്റെ രണ്ടു വശത്തായി നിലയുറപ്പിച്ച് ആഞ്ഞുവലിക്കുന്ന വടം വലിയും അതിന്റെ ചെറുതും വലുതുമായ മത്സരങ്ങളും മാറ്റിനിർത്തി മലയാളിക്ക് ഒന്നും ആലോചിക്കാനാകില്ല. നിലക്കാതെ കൈയടിച്ചും ആർത്തു വിളിച്ചും കുട്ടികളും മുതിർന്ന വരുമെന്ന വ്യത്യാസമില്ലാതെ പങ്കാളിത്തം ഉറപ്പാക്കിയുള്ള ഈ കിടിലൻ അങ്കം കാണാൻ ചേലു വേറെതന്നെ.

കൈയൂക്കും തിണ്ണമിടുക്കും മാത്രമല്ല, പതിയെ കയറിപ്പിടിക്കുന്ന ചുവടുകളും ആവേശത്തിര തീർക്കുന്ന അനൗൺസ്മനും ഒന്നിച്ചുണരുന്ന വടംവലി ഏറെയായി മലയാളി ഉത്സവങ്ങളുടെ ഒന്നാം ചേരുവയാണ്. ഓരോ നാട്ടിലെയും കുട്ടിക്കൂട്ട ങ്ങൾ മുതൽ സ്ത്രീകളും മുതിർന്നവരും വരെ ഏവർക്കും ഒരു പോലെ ഒന്നുപിടിച്ചുനോക്കാവുന്ന ആഘോഷം. പണവും മുട്ടനാടും മുതൽ പഴക്കുല വരെ സമ്മാനമായി മത്സരം കൊഴുപ്പിക്കാനുണ്ടാകും. ആരോഗ്യത്തിനൊപ്പം ബുദ്ധിയും ചടുലതയും ഒന്നിച്ചാണ് കളിയിൽ വിധി നിർണയിക്കുക.

ചില്ലറക്കാരനല്ല വടംവലി

എളുപ്പം സംഘടിപ്പിക്കാവുന്ന, ഏതു സാധാരണക്കാരനും പങ്കാളിയാകാവുന്ന കായിക ഇനമാണെങ്കിലും വടംവലി അത്ര ചില്ലറക്കാരനല്ല. ഒരു കാലത്ത് ഒളിമ്പിക്സിൽ വരെ മെഡൽ പോരാട്ടമായി ജയിച്ചുനിന്ന പാരമ്പര്യവും പെരുമയുമേറെയുള്ള ഇനം. പല രാജ്യങ്ങളിലെ താരങ്ങൾ അണിനിരന്ന് വമ്പൻ ക്ലബുകളായി ആഗോള തലത്തിൽ പോര് കനപ്പിച്ചു നിർത്തിയ മത്സരം. ഇന്നും ലോകത്തിന്റെ പല ഭാഗങ്ങളിൽ വടംവലി കായിക ഇനമാണ്.