ആരോഗ്യ ജീവിതത്തിന് 10 മന്ത്രങ്ങൾ

ശാരീരിക- മാനസിക ആരോഗ്യത്തോടെ ദീർഘകാലം ജീവിക്കുക എന്നത് ഏതൊരു മനുഷ്യന്റെയും സ്വപ്നമാണ്. ചിട്ടയായ ജീവിതരീതി പിന്തുടരുകയാണെങ്കിൽ ഒരു പരിധിവരെ ആരോഗ്യത്തോടെ, രോഗങ്ങളില്ലാതെ ദീർഘകാലം ജീവിക്കാനാകും

- ബീന അനിത

ആരോഗ്യം തന്നെ സമ്പത്ത്'. കേട്ടു തഴമ്പിച്ചു അല്ലേ?. രോഗങ്ങൾ, അതും ജീവന് ആപത്കരമായ രോഗങ്ങൾ സർവസാധാരണമായ ഈ കാല ഘട്ടത്തിൽ ആരോഗ്യം എന്നത് ലക്ഷ്വറിയായി മാറിയിരിക്കുന്നു. ജീവിതശൈലി രോഗങ്ങൾ പുതുമയല്ലാതെയായി. ഇരുപതുകളിലും മുപ്പതുകളിലും പോലും ഹൃദ്രോഗവും സ്ട്രോക്കും വൃക്ക പ്രശ്നങ്ങളും കരൾരോഗങ്ങളും മാനസികാരോഗ്യ ബുദ്ധിമുട്ടുകളും നമ്മെ വേട്ടയാടുന്ന കാലത്തിലൂടെയാണ് കടന്നുപോക്ക്.

ഇതിനിടെയാണ് പകർച്ചവ്യാധികൾ പലവിധമായി പെരുകുന്നത്. ഇതിനെല്ലാം ഇടയിലും നമ്മൾ മനസ്സുവെച്ചാൽ രോഗങ്ങളെ പ്രതിരോധിച്ചുനിർത്താം. അതിന് മനസ്സും ശരീരവും ഒത്തുചേർന്ന് പ്രവർത്തിക്കണമെന്നുമാത്രം. ആധുനിക ലോകത്തെ അത്യാധുനിക ശീലങ്ങളിൽ തളച്ചിടപ്പെട്ട് വെല്ലുവിളി നേരിടുന്ന നമ്മുടെ ആരോഗ്യം പോസിറ്റിവ് ട്രാക്കിൽ മുന്നോട്ടു കൊണ്ടുപോകാൻ ഈ 10 മന്ത്രങ്ങൾ മനസ്സിലോർത്തോളൂ...

01 ഭക്ഷണംതന്നെ ആദ്യ കരുതൽ

ഭക്ഷണം തന്നെയാണല്ലോ ജീവിതത്തിന്റെ അടിസ്ഥാനം. ആരോഗ്യത്തിന് റെഡ് കാർഡ് കിട്ടാതെ കാക്കാൻ ആദ്യം ശ്രദ്ധിക്കേണ്ടതും ഭക്ഷണ പ്ലേറ്റിൽ തന്നെ.

ദിവസവും സമീകൃത ആഹാരം (ബാലൻസ്ഡ് ഡയറ്റ് കഴിക്കുക എന്നതിനാണ് പ്രധാന ശ്രദ്ധ നൽകേണ്ടത്.

ഡയറ്റ് കൃത്യമായി പാലിച്ച് പോഷകഘടകങ്ങൾ ആവശ്യത്തിന് ലഭിച്ചാൽ നമുക്കു വേണ്ട വിറ്റമിനുകളും മിനറലുകളും ശരീരത്തിൽ കൃത്യ അളവിൽ എത്തിയിരിക്കും.

കാർബോഹൈഡ്രേറ്റ് (അന്ന ജം), പ്രോട്ടീൻ, ഫാറ്റ്, നാരുകളടങ്ങിയ ഭക്ഷണം, പഴംപച്ചക്കറി ഇവയെല്ലാം ആവശ്യത്തിന് ദൈനംദിന ഭക്ഷണത്തിൽ ഉൾപ്പെടുത്തണം. ഓരോ നേരത്തെ ഭക്ഷണത്തിലും ഇവയുടെ അളവ് കൃത്യമായി വേണം.

സമീകൃത ആഹാരത്തിലുടെ രോഗപ്രതിരോധ ശേഷി ഉയർത്താനാകും. ശരീരത്തിലെ ഓരോ ഇന്ദ്രിയത്തിനും ഉണർവ് ലഭിക്കുന്നതിനാപ്പം ക്ഷീണം, തളർച്ച, വിളർച്ച, രക്തക്കുറവ് എന്നിവയെല്ലാം അകറ്റാനാവും.

ബി.പി, ഹൃദയാരോഗ്യം, ശരീരഭാരം എന്നിവ ഡയറ്റിൽ ശ്രദ്ധവെക്കുന്നതിലൂടെ മെച്ചപ്പെടുത്താം.

കോശങ്ങൾ റിപ്പയർ ചെയ്യാനും മസിൽ ബലപ്പെടുത്താനും കഴിയും.

കുട്ടികൾക്ക് ചെറുപ്രായത്തിൽ തന്നെ സമീകൃത ആഹാരം ശീലിപ്പിക്കണം.

അമിതമായ റെഡ് മീറ്റ് ഉപയോഗം കുറക്കാം. ഇതിൽ പൂരിത കൊഴുപ്പും കൊളസ്ട്രോളും വലിയ അളവിലുണ്ട്. ഇവ ഹൃദ്രോഗം, അമിത വണ്ണം, സ്ട്രോക്ക്, അർബുദ സാധ്യത എന്നിവ വർധിപ്പിക്കും.