કચ્છમાં વિવિધ પ્રકારના પ્રવાસન વિકસી શકે છે

છેલ્લા બે દાયકાથી કચ્છની ગણના ગુજરાતના સૌથી વધુ ઝડપથી વિકસતા જિલ્લા તરીકે થઈ રહી છે. અન્ય ઉદ્યોગોની સાથે-સાથે અહીં પ્રવાસન પણ એક ઉદ્યોગ તરીકે ખૂબ ઝડપથી આગળ વધી રહ્યું છે. સફેદ રણ હોય કે માંડવીનો સ્વચ્છ દરિયાકિનારો કે મહેલો, જંગલોની સાથે-સાથે એવી પણ અનેક જગ્યાઓ છે જ્યાં ઇકો, હૅન્ડિક્રાફટ, એડવેન્ચર, પુરાતત્ત્વીય, જીયો કે મરીન ટૂરિઝમ વિકસી શકે છે. વિવિધ પ્રકારના ટૂરિઝમના વિકાસની સાથે કચ્છના સ્થાનિક લોકોને મળતી રોજગારીમાં પણ વધારો થશે.

- સુચિતા બોઘાણી કનર

સરહદી કચ્છની જમીન, દરિયો કે રણની જેમ અહીંની સંસ્કૃતિ, હસ્તકળા આગવી છે. અહીંની જમીન લાખો વર્ષ જૂનો ઇતિહાસ સંગ્રહીને બેઠી છે. પ્રાગૈતિહાસિક સજીવો અને હજારો વર્ષ જૂની માનવ સંસ્કૃતિનું પગેરું કચ્છની ધરતીમાં મળી રહે છે. રજવાડાંઓની વિરાસત કચ્છમાં ઠેર-ઠેર જોવા મળે છે. અહીંનું સફેદ રણ દર વર્ષે લાખો પ્રવાસીઓને આકર્ષે છે. જો અહીં નવીન નવીન પ્રકારના પ્રવાસનનો વિકાસ કરાય તો હજુ વધુ પ્રવાસીઓ કચ્છની વારંવાર મુલાકાત લેવા મજબૂર બનશે, તે વાતમાં બેમત નથી.

હોડકો પાસેનું સફેદ રણ આજે વિશ્વવિખ્યાત બન્યું છે, પરંતુ કચ્છમાં આવા જ સુંદર રણ બીજે પણ છે, તેની બહુ ઓછા લોકોને જાણ છે. રણોત્સવમાં આવનારા લોકો તો સફેદ રણનું સૌંદર્ય જોઈને જ વિદાય લે છે, પરંતુ આ રણ જેટલું જ સુંદર અને તેનાથી વધુ સ્વચ્છ, શાંત એવું સફેદ રણ ધોળાવીરા જતાં રસ્તામાં આવે છે. ખડીર બેટના અમરાપર પાસેનું આ રણ પણ હોડકો પાસેના રણ જેવું જ સફેદ છે. ત્યાં પણ ચાંદની રાતના બરફાચ્છાદિત જમીન જેવું દશ્ય જોવા મળે છે. આ ઉપરાંત માંડવીના પ્રવાસીઓના પ્રિય બીચ કરતાં પણ વધુ સરસ અને પ્રદૂષણવિહોણા બીચ પિંગલેશ્વર મહાદેવ મંદિર, રાવળપીર મંદિર, આશર માતા મંદિર કે બુડી તીર્થધામ પાસેના દરિયા કિનારા છે. અહીંના રણમાં કે બીચ ઉપર એડવેન્ચર ટૂરિઝમ વિકસી શકે તેવી શક્યતા છે.

પ્રવાસનનો વિકાસ કરછી હસ્તકલાના કારીગરો માટે પણ રોજગારીનો વિકલ્પ બનશે