મુકેશનાં પત્ની સરલાબહેનના મોસાળ વડોદરામાં મુકેશ અવાર-નવાર આવતાં

એક સમયે સ્ટ્રગલ કરી રહેલા મુકેશજી સાથે લગ્ન માટે પરવાનગી ન મળતાં બંનેએ મુંબઈમાં ભાગી જઈને પ્રેમલગ્ન કરેલાં

હું ઘણો નાનો હતો ત્યારે મુકેશનાં ગીતો રેડિયો પર સાંભળતો. મારાં માતાપિતા સિનેમાના શોખીન હોવાથી અમે નિયમિત ફિલ્મો જોવા જઈએ, પણ આપણી કોઈ ફિલ્મી વ્યક્તિ સુધી પહોંચ હોય નહીં.

અમે વડોદરાના તેહગંજ વિસ્તારમાં એક નાનો ફ્લેટ લીધો અને નસીબજોગે પંદર વર્ષ સુધી મુકેશજીની માનવીય પાસાંઓની વાતો સાંભળીને તેમને અમારા હૃદયમાં વંદનીય સ્થાન આપ્યું.

હા, ગાયક મુકેશનાં પત્ની સરલાબહેનનું મોસાળ વડોદરામાં, એ નાતે મુકેશ ઘણીવાર વડોદરા આવતા. હું ચોથા પાંચમા ધોરણમાં હતો. લગભગ ૧૯૭૭૭૮થી માંડીને લગભગ ૧૯૯૨ સુધીના વર્ષનો ગાળો..

અમારા પડોશી મુકેશનાં માસીસાસુ, ક્ષમામાસી થાય. પાક્કા મજાના ગુજરાતી તથા લગભગ સરખી ઉંમર હોવાથી સરલાબહેનનાં ગાઢ સખી થાય. અમે રહેવા આવ્યા એ અરસામાં મુકેશનું નિધન થયું હતું. જો મુકેશ જીવિત હોત તો તેઓ કન્ફર્મ અમને જોવા મળ્યા હોત. તેમણે ક્ષમામાસીના ઘરે આવવાનું પ્રોમિસ આપ્યું હતું.