એનાલિસિસ

મતદારોને મતિભ્રમ કરતાં પ્રજાદ્રોહના રાજકારણની હવે સરેઆમ બોલબાલા

- સુધીર એસ. રાવલ

સમાચાર એ નથી કે બિહારના અણનમ મુખ્યમંત્રી અને પલટુરામથી પરિચિત નીતિશ કુમારે ફરી પલટી મારીને ભાજપ સાથે સરકાર બનાવી દીધી. સમાચાર એ પણ નથી કે લાલુ-તેજસ્વીના રાષ્ટ્રીય જનતા દળ અને કોંગ્રેસ સાથે નીતિશ કુમારે વગર કારણે શા માટે દગો કર્યો? અને સમાચાર એ પણ નથી કે એનડીએ અને ઇન્ડિયા ગઠબંધનનાં રાજકીય સમીકરણોમાં હવે શું ફેરફાર થશે? સમાચાર એ છે કે ભારતની લોકશાહી હવે બદલાઈ ચૂકી છે, જેમાં મતદારો કોને મત આપે છે કે નથી આપતા, તેનું હવે કોઈ મહત્ત્વ જ નથી! સમાચાર એ છે કે, નવા ભારતની નવી લોકશાહીમાં રાજનેતાઓ શું કહે છે કે શું વચન આપે છે, તેના પર ધ્યાન દેવાની, નોંધ લેવાની કે યાદ રાખવાની હવે જરૂર નથી! અને સૌથી મહત્ત્વના સમાચાર એ છે કે, હવે નવી તરકીબ શોધાઈ ચૂકી છે, જેમાં કોઈને પણ પક્ષપલટો કરાવ્યા વગર માનભેર આખેઆખી સરકારને રાતોરાત બદલાવી શકાય છે! આ અદ્ભુત તરકીબ એવી છે કે રાજીનામું આપનાર મુખ્યમંત્રીની ખુરશી સલામત રહે છે અને રાજીનામું ન આપનાર ઉપમુખ્યમંત્રીની ખુરશી ગાયબ થઈ જાય છે..! સાચે જ ભારતના રાજનેતાઓને શાબાશી આપવી પડે કે લોકશાહી શાસન વ્યવસ્થામાં મતદારોને તકલીફ આપ્યા વગર પોતાના લાભમાં, પોતાની રીતે તડજોડ કરવાની મોકળાશ મેળવવા માટે હવે તેમણે કાયદાઓની મર્યાદામાં રહીને જ..હા, કાયદાઓની મર્યાદામાં રહીને છડેચોક મતદારો સાથે દ્રોહ કરી શકવાની નવી ટૅનિક શોધી કાઢી છે..! બિહાર અને મહારાષ્ટ્ર જેવાં રાજ્યોના રાજકારણને જોયા પછી દુનિયાભરના લોકશાહી દેશો માટે ભારત હવે એક કેસ સ્ટડી છે..!