હેલ્થ સ્પેશિયલ

નાની ઉમરના લોકોમાં કેન્સરનું પ્રમાણ વધી રહ્યું છે

- વિનોદ પંડ્યા

વૃદ્ધ લોકોમાં કૅન્સર થવાનું પ્રમાણ ઘટી રહ્યું છે, પણ તે સામે પ્રમાણમાં નાની ઉંમરના તેમ જ યુવાન લોકોમાં કૅન્સર લાગુ પડવાનું પ્રમાણ વધી રહ્યું છે. નાની વય જૂથમાં કૅન્સરનું પ્રમાણ વધવું એ ખરેખર ચિંતાજનક બાબત છે. નિષ્ણાતો અને શરીર વિજ્ઞાનીઓ સામે નવા સવાલો અને નવા પડકારો ઊભા થયા છે.

નાની અને યુવાન તેમ જ વયસ્કોની પેઢીમાં હમણાં સુધી કૅન્સર લાગુ પડવાનું પ્રમાણ ઘણું ઓછું હતું. સાઠ વરસની ઉંમર બાદ કૅન્સર લાગુ પડે એવી એક આમ ધારણા દસ-વીસ વરસ અગાઉ હતી. ઉંમરની એ મર્યાદા ઘટી રહી છે. એક તો જૂની માન્યતા અથવા વહેમ કે નાની ઉંમરમાં કૅન્સર લાગુ ન પડે, તેના કારણે નાની ઉંમરે થતાં કૅન્સરોનું તબીબો જલ્દીથી નિદાન કરતાં નથી. બીજાં નિદાનો કરી દવાઓ આપે.

આખરે બધાં નિદાનો નિષ્ફળ જાય ત્યારે કૅન્સર માટેના ટેસ્ટ કરાવે. તે દરમિયાન ઘણું મોડું થઈ ગયું હોય. કૅન્સર ફેલાઈને ત્રીજા કે ચોથા સ્ટેજમાં પ્રવેશી ગયું હોય, જેની અસરકારક સારવાર શક્ય રહેતી નથી. હમણાં સુધી ડૉક્ટરો પણ જલ્દીથી એ વાત સ્વીકારતા ન હતા કે નાની ઉંમરમાં કૅન્સર લાગુ પડે, પણ જુવાનીમાં કૅન્સરના કિસ્સાઓ ખૂબ વધી ગયા છે. તેથી ડૉક્ટરોની માન્યતા પણ જરૂર બદલાઈ હશે. નાનાં નાનાં બાળકોના આધાર સમા પિતાઓ અને માતાઓ કૅન્સરથી મરણનો ભોગ બની રહ્યાં છે. વૃદ્ધોનું કૅન્સરથી મરણ નીપજે અને યુવાનોનું નીપજે તેમાં ઘણો ફરક છે. યુવાનના મૃત્યુની સામાજિક અને આર્થિક મોટી ખરાબ અસર પડે છે. ઘણાં કુટુંબો બેહાલ બની જાય છે.