પછી તો જેવી ભગવાનની મરજી..

મોરબીના ઝૂલતા પુલનો કૅબલ તૂટ્યો અને ૧૩૫ જણના જાન લેતો ગયો એ ભગવાનની મરજી હતી કે આપણી નિષ્કાળજી?

- દીપક સોલિયા

મોરબીનો ઝૂલતો પુલ તૂટ્યો એ મામલે પુલનો વહીવટ સંભાળનારી કંપનીના મૅનેજર દીપક પારેખે કોર્ટમાં એવી રજૂઆત કરી કે આ વખતે (પુલ ખુલ્લો મુકાયો એ વાતે) ભગવાન રાજી નહીં હોય એટલે આવું થયું.

આ નમ્ર અને ભક્તિપૂર્ણ રજૂઆત સાંભળીને મેજિસ્ટ્રેટ સાહેબે દીપક પારેખની ઝાટકણી કાઢી. અહીં પણ શું એ જ વાત લાગુ પડી હશે? ભગવાન રાજી નહીં હોય એટલે મેજિસ્ટ્રેટ નારાજ થયા હશે?

આમ પણ સામાન્ય માનવી તો માનતો જ હોય છે કે ભગવાનની ઈચ્છા વિના આ પૃથ્વી પર પાંદડું પણ ન હલી શકે. તો શું ખરેખર જગતમાં બધેબધું ભગવાનની મરજી પ્રમાણે જ થાય છે?

આ સમજવા માટે પહેલાં તો ભગવાનની મરજી એટલે શું એ સમજવું પડે.

આસ્તિકો જેમને ભગવાન કહે છે એના માટે નાસ્તિકો તથા વિજ્ઞાનીઓ જે શબ્દ વાપરે છે એ છે કુદરત અથવા તો પ્રકૃતિ. આ જગતની બધી જ કુદરતી ઘટના કુદરતના નિયમ એટલે કે ભગવાનની મરજી મુજબ બને છે. સફરજન ઝાડ પરથી ઉપર ઊડી જવાને બદલે નીચે પડે છે એની પાછળના કારણને ન્યૂટને ગુરુત્વાકર્ષણનું નામ નહોતું આપ્યું એ પહેલાં પણ એ વૈજ્ઞાનિક નિયમ-ભગવાનની મરજી તો કામ કરતાં જ હતાં અને સફરજન ઉપરથી નીચે જ પડતું હતું.

સો-બસ્સો માણસનો ભાર ઊંચકી શકનારા પુલ પર જ્યારે ત્રણસો-ચારસો જણ ભેગા થઈ જાય તો પુલ તૂટે જ... ખવાઈ ગયેલા કૅબલ્સ પર ઝાઝું વજન આવે તો કૅબલ્સ તૂટે જ... તૂટનારા પુલ પરના મનુષ્યો પીછાંની જેમ ધીમે ધીમે નીચે ન આવે, બલકે જોરથી નીચે પટકાય જ... જ્યાં ચોકસાઈ ન હોય ત્યાં લોચા પડે જ... આ બધા કુદરતના અફર નિયમો છે. એટલે જો દીપક પારેખ સમગ્ર પુલ-દુર્ઘટનાને ભગવાનની મરજી તરીકે ઓળખાવતા હોય તો એ ખોટા નથી, પણ સવાલ એ છે કે ભગવાનની મરજી એટલે કે કુદરતના આ બધા અફર નિયમોની સૌને પહેલેથી જાણ હતી જ. તો પછી એનો ભંગ શા માટે કરવામાં આવ્યો?