மூன்று மாவட்டங்களில் ரூ.20,000 கோடி வருவாய்க்கு வாய்ப்பு

செங்கல் சூளை மண் எடுப்பு

சென்னை, ஏப். 13: செங்கல் சூளை, மண்பாண்ட தயாரிப்புக்காக திரு வள்ளூர் உள்ளிட்ட3 மாவட்டங்களில் குறித்த காலத்தில் மண் எடுக்க அனுமதித்தால், ஆண்டுக்கு ரூ.20 ஆயிரம் கோடி வரை வருவாய் கிடைக்க வாய்ப்புள்ளதாக நீர்வளத் துறை அமைச்சர் துரைமுருகன் தெரிவித்தார்.

சட்டப்பேரவையில் வியாழக்கிழமை நேரமில்லாத நேரத்தில் இது குறித்த பிரச்னையை எதிர்க்கட்சித் தலைவர் எடப்பாடி கே.பழனிசாமி உள்ளிட்ட அதிமுக உறுப்பினர்களுடன், திமுக, காங்கிரஸ் உறுப்பினர்களும் கொண்டு வந்தனர்.

அதிமுக சார்பில் தளவாய் சுந்தரம் பேசுகையில், 'ஒரு செங்கல் விலை ரூ.6. உற்பத்திச் செலவோ ரூ.5.95 ஆகிறது. 5 பைசா மட்டுமே லாபம் கிடைக்கிறது. தற்போதைய விதிகளைத் தளர்த்தி, 2002-ஆம் ஆண்டு 105-ஆவது அரசாணைப் படி, ஏழை எளிய மக்கள் பயன்பெறக் கூடிய வகையில் மண் எடுக்க அனுமதி தர வேண்டும்' என்றார். இதேபோன்ற கோரிக்கையை, திமுக உறுப்பினர் கோ.தளபதி, காங்கிரஸ் உறுப்பினர் ரூபி ஆர். மனோகரன் ஆகியோரும் எழுப்பினர்.