துணிவுடன் பயங்கரவாதத்தை ஒடுக்கும் இந்தியா

மும்பையில் கடந்த 2008-இல் நடத்தப்பட்ட பயங்கரவாதத் தாக்குதலில் உயிரிழந்தோருக்கு நினைவஞ்சலி செலுத்திய பிரதமா் மோடி, ‘நாட்டையே உலுக்கிய அந்தத் தாக்குதலில் இருந்து மீண்டதோடு, தனது முழுமையான துணிவுடன் பயங்கரவாதத்தை ஒடுக்கி வருகிறது இந்தியா’ என்று கூறினாா்.

107-ஆவது ‘மனதின் குரல்’ நிகழ்ச்சி ஞாயிற்றுக்கிழமை (நவ. 26) ஒலிபரப்பானது. மும்பை தாக்குதல் நினைவு தினம் என்பதால், அதில் உயிரிழந்தோருக்கு நினைவஞ்சலி செலுத்தி, பிரதமா் மோடி பேசியதாவது:

நவம்பா் 26-ஆம் தேதியை நாம் ஒருபோதும் மறக்க முடியாது. நாட்டில் மிகக் கொடூரமான பயங்கரவாதத் தாக்குதல் நடத்தப்பட்ட தினம். மும்பை மட்டுமன்றி ஒட்டுமொத்த தேசத்தையும் பயங்கரவாதிகள் உலுக்கிவிட்டனா். ஆனால், அந்தத் தாக்குதலில் இருந்து மீண்டது மட்டுமன்றி, தனது முழுமையான துணிவுடன் பயங்கரவாதத்தை ஒடுக்கி வருகிறது இந்தியா. இதுவே, நமது தேசத்தின் வல்லமை.

மக்களுக்கு வாழ்த்து: நவ. 26-ஆம் தேதி மற்றொரு காரணத்துக்காகவும் முக்கியத்துவம் வாய்ந்ததாகும். கடந்த 1949-ஆம் ஆண்டில் இதே தினத்தில்தான், நாட்டின் அரசமைப்புச் சட்டம் அரசியல் நிா்ணய சபையால் ஏற்றுக் கொள்ளப்பட்டது.

2015-ஆம் ஆண்டுமுதல் இந்த தினம் அரசமைப்புச் சட்ட தினமாக கொண்டாடப்பட்டு வருகிறது. இந்நாளில் நாட்டு மக்கள் அனைவருக்கும் வாழ்த்துகளைத் தெரிவிக்கிறேன். ஒவ்வொருவரும் கடமைகளுக்கு முன்னுரிமை அளித்து ஒன்றிணைவதன் மூலம் இந்தியாவை வளா்ந்த நாடாக்கும் உறுதியை நிச்சயம் நிறைவேற்ற முடியும்.