સિવિલ હોસ્પિટલમાં લાખો રૂપિયાનો ભંગાર સડી રહ્યો છેઃ તંત્ર બેદરકાર

સ્ટ્રેચર, સ્ટીલના બાંકડા, વ્હીલચેરના હિસાબનું કોઈ રણીધણી નથીઃ કરોડો રૂપિયાનાં કૌભાંડની આશંકા, સિવિલને પોતાનો અડ્ડો સમજીને બેઠેલા લોકોની સંડોવણી હોવાની શક્યતા

અમદાવાદ, શુક્રવાર

અમદાવાદ સિવિલ હોસ્પિટલમાં નઘરોળ તંત્રના કારણે ગેરવ્યવસ્થાનાં છાશવારે અવનવાં ઉદાહરણ પ્રકાશમાં આવી રહ્યાં છે ત્યારે દર્દીઓની સુખ સુવિધા માટે નવા નવા પ્રોજેક્ટો અમલમાં મુકાય છે તેમજ લાખો રૂપિયાનાં ખર્ચે સાધનો વસાવવામાં આવી રહ્યાં હોવા છતાં સત્તાવાળાઓની આળસના કારણે તેનો ખાસ લાભ મળી શકતો નથી. આનું ઉદાહરણ સિવિલ હોસ્પિટલમાં છેલ્લા ઘણા સમયથી સડી રહેલાં સ્ટ્રેચર, સ્ટીલના બાંકડા, વ્હીલચેર, દર્દીઓ માટેના પલંગ દર્શાવે છે. દર્દીઓની સુખ સુવિધા માટે ખરીદવામાં આવતી ચીજવસ્તુઓ ક્યાંકને ક્યાંક કરોડો રૂપિયાનાં કૌભાંડ તરફ ઇશારો કરી રહી છે જેમાં સિવિલ હોસ્પિટલના કેટલાક લોકોની સંડોવણી હોવાની શક્યતાઓ છે.