ઇન્ટીરિયર ડિઝાઈનર યુવતીને પ્રેમજાળમાં ફસાવી ગઠિયાએ ૪૭ લાખ ખંખેરી લીધા

ગઠિયાએ પોતે સર્જન હોવાની ઓળખ આપી પૂરપીડિતોને મદદ કરવાના બહાને યુવતી સાથે ઠગાઈ આચરી: યુવતીને વિદેશ બોલાવી લગ્નની લાલચ પણ આપી હતી

અમદાવાદ, મંગળવાર

અલગ અલગ સોશિયલ મીડિયા સાઈટ પરથી જીવનસાથી શોધતી યુવતીઓ માટે ચેતવણીરૂપ કિસ્સો પ્રકાશમાં આવ્યો છે. શહેરના રામોલમાં રહેતી ઇન્ટીરિયર ડિઝાઈનર યુવતીને પ્રેમજાળમાં ફસાવી ગઠિયાએ ૪૭ લાખ રૂપિયા ખંખેરી લીધા હોવાની ઘટના સામે આવી છે. ગઠિયાએ પોતે સર્જન હોવાની ઓળખ આપી યુવતીને વિદેશ ફરવા માટે બોલાવી લગ્નની લાલચ આપી હતી.

રામોલના સદ્ગુરુ સાંનિધ્યમાં રહેતી વૈદેહી ઓઝાએ અર્જુન મોટવાણી વિરુદ્ધ ઠગાઈની ફરિયાદ નોંધાવી છે. વૈદેહી વસ્ત્રાપુર ખાતે કનેક્ટ નામની ઓફિસ ધરાવે છે અને તે દ્વારા ઇન્ટીરિયર ડિઝાઈનરનું કામ કરે છે.

તા. ૨૫-૫-૨૦૨૧ના રોજ બમ્બલ એપ્લિકેશન થકી અર્જુન મોટવાણી નામની વ્યક્તિ સાથે વૈદેહીને મેસેજ દ્વારા વાતચીત થઇ હતી. અર્જુન મોટવાણીએ વૈદેહીને કહ્યું કે હું કાર્ડિયોલોજી સર્જન છું હું અને મુંબઈ ખાતે લીલાવતી હોસ્પિટલ તથા બ્રીચ કેન્ડી હોસ્પિટલમાં કામ કરી હાલ અમદાવાદ ખાતે એપોલો હોસ્પિટલમાં સર્જન તરીકે ફરજ બજાવું છું. આમ, તેઓ એકબીજાના પરિચયમાં આવ્યાં હતાં. ત્યારબાદ તેઓ એકબીજા સાથે વોટ્સએપમાં વાતચીત કરતાં હતાં. આ દરમિયાન અર્જુને કહ્યું કે મને એપોલો હોસ્પિટલથી સર્જરી માટે કોચિન મોકલે છે. આ સમયે અર્જુન વૈદેહીની ઓફિસ પર બેઠો હતો. ત્યાં તેણે વૈદેહી સાથે થોડો સમય પસાર કર્યો હતો.