નારોલમાં બુટલેગરનો આતંકઃ કારના કાચ તોડી પરિવારને ધમકી આપી

સોશિયલ મીડિયામાં બુટલેગરનો વીડિયો વાઈરલ થતાં નારોલ પોલીસની કામગીરી પર સવાલ ઊભા થયા

અમદાવાદ, મંગળવાર 

ચૂંટણી નજીક આવી રહી છે ત્યારે શહેરના પૂર્વ વિસ્તારમાં લો એન્ડ ઓર્ડરની સ્થિતિ ખરાબ થતી હોય તેવું લાગી રહ્યું છે. વસ્ત્રાલમાં થોડા દિવસ પહેલાં ૧૫ કરતાં વધુ લુખ્ખાં તત્ત્વોએ કાર તેમજ વાહનોના કાચ તોડીને મચાવેલા આતંકનો મામલો હજુ શાંત નથી પડ્યો ત્યારે એક કુખ્યાત બુટલેગરે ચિક્કાર દારૂ પીધેલી હાલતમાં કારના કાચ તોડીને રહીશોને ધમકી આપતાં મામલો પોલીસ સ્ટેશન સુધી પહોંચ્યો છે. બુટલેગર બંગલોઝમાં ઘૂસી ગયો હતો અને તેણે બેટ વડે મહિલાઓને ધમકી આપી હતી. ત્યાર બાદ કારના કાચ તોડી નાખ્યા હતા. બંગલોઝના રહીશોએ બુટલેગરની હરકતો મોબાઇલ ફોનમાં રેકોર્ડિંગ કરી લીધી હતી, જે સોશિયલ મીડિયામાં વાઈરલ થઇ છે.