અમદાવાદ માં વહેલી સવારે ગાઢ ધુમ્મસ સાથે ૧૩.૪ ડિગ્રી ઠંડીનો પ્રહારઃ લોકો ઠૂંઠવાયા

નલિયામાં ૬.૪ ડિગ્રી અને રાજકોટમાં ૯.૫ ડિગ્રી ઠંડી નોંધાઈ

અમદાવાદ સહિત રાજ્યના મોટા ભાગના વિસ્તારોમાં શિયાળાએ જોરદાર જમાવટ કરી છે અને ગાત્રો થીજવતી ઠંડી લોકોને પરેશાન કરી રહી છે. અમદાવાદમાં આજે વહેલી સવારે ગાઢ ધુમ્મસની ચાદર સાથે ઠંડીએ આકરો પ્રહાર કર્યો હતો અને ૧૩.૪ ડિગ્રી લઘુતમ તાપમાનમાં અમદાવાદીઓ રીતસર ઠૂંઠવાયા હતા.

હવામાન વિભાગે જણાવ્યું છે કે હાલ ગુજરાતમાં ફૂંકાતા પવનોની દિશા સતત બદલાતી રહે છે, જેના કારણે રાજ્યમાં કેટલાક વિસ્તારોમાં અત્યંત ઠંડીનો અનુભવ થઈ રહ્યો છે તો ક્યાંક તાપમાનમાં વધારો પણ નોંધાયો છે. ખાસ કરીને સૌરાષ્ટ્ર અને કચ્છના કેટલાક વિસ્તારોમાં ઉત્તર તરફથી ફૂંકાતા બરફીલા પવનોના કારણે તાપમાન ઘટ્યું છે અને ઠંડીનું પ્રમાણ વધ્યું છે.

હવામાન નિષ્ણાતોના જણાવ્યા અનુસાર આગામી પાંચ દિવસ સુધી સૌરાષ્ટ્ર અને કચ્છ પર કાતિલ કોલ્ડવેવનો ખતરો તોળાઈ રહ્યો છે. આ આગાહીને જાણે સાચી પાડતી હોય એ રીતે ઠંડી વધી છે અને કચ્છના નલિયામાં આજે સવારે ૬.૪ ડિગ્રી અને સૌરાષ્ટ્રના રાજકોટમાં ૯.૫ ડિગ્રી ઠંડી નોંધાતાં લોકો ધ્રૂજી ઊઠ્યા હતા.